قازاقستاندا قالدىقتاردى ءتيىمدى باسقارۋدىڭ وزىق ۇلگىسى ەنگىزىلەدى
وسىعان وراي ەكولوگيا، گەولوگيا جانە تابيعي رەسۋستار مينيسترلىگى جانىنداعى قوعامدىق كەڭەس جاڭا قۇجاتتى بەكىتتى، دەپ حابارلايدى قازاقپارات «و ك م وپەراتورى» ج ش س باسپا ءسوز قىزمەتىنە سىلتەمە جاساپ.
قۇجاتتىڭ باستى ماقساتى - قالدىقتاردى كەشەندى باسقارۋ جۇيەسىن دامىتۋ، قالدىقتاردىڭ قورشاعان ورتاعا تيگىزەتىن اسەرىن ازايتۋ، سونداي-اق قالدىقتاردان قايتالاما شيكىزات الۋ جانە ونى ەنەرگيا كوزى رەتىندە پايدالانۋ. اتاپ ايتقاندا جەكەلەگەن ايماقتاردا تۇرمىستىق قاتتى قالدىقتاردى بولەك تاستاۋ جۇيەسىن ەنگىزۋ، سۇرىپتاۋ جەلىسىن قوسۋ، قالدىقتان ەنەرگيا وندىرەتىن زاۋىت قۇرىلىسىنا ينۆەستورلار تارتۋ قاراستىرىلعان.
«قالدىقتان ەنەرگيا ءوندىرۋ تاجىريبەسى كوپتەگەن مەملەكەتتەردە قولدانىستا بار. اتالعان ءادىس- تاجىريبەنى ەلىمىزدە قولدانۋ قالدىقتى ءتيىمدى باسقارۋدىڭ وڭ شەشىلۋىنە ىقپال ەتەدى. ناتيجەسىندە قوقىس پوليگوندارىنان پارنيكتىك گازداردىڭ شىعۋىن ازايتىپ، ەلىمىزدە كومىلەتىن قتق كولەمىن %90 دەيىن قىسقارتۋعا مۇمكىندىك بەرەدى. كومىلەتىن قالدىق كولەمىن قىسقارتۋ، قايتا وڭدەۋدى ۇلعايتۋ جانە دە تۇتىنۋشى ىدىسىنا دەپوزيتتىك جۇيە ەنگىزۋ وپەراتور ستراتەگياسىندا ۇسىنىلىپ وتىر. ياعني، بوس ىدىستى قايتا تاپسىرعان تۇتىنۋشى ىنتالاندىرىلادى. سول ارقىلى تۇرمىستىق قالدىقتاردىڭ قايتا وڭدەۋ ۇلەسى ارتادى» دەلىنگەن حابارلامادا.
قوعامدىق كەڭەستە زاڭسىز قوقىس الاڭدارىن جويۋعا وپەراتوردىڭ قاتىسۋى جانە اتالعان شارانى ورىنداۋعا ورتاق قارجىلاندىرۋ ماسەلەسى قاراستىرىلدى. زاڭسىز قوقىس الاڭىنا اينالعان پوليگوندار جانىنا ۋاقىتشا بەكەتتەر ورناتۋ ۇسىنىلدى. ول جەردە قالدىقتى جاعۋعا ارنالعان ۋاقىتشا قۇرىلعى بولادى. اتالعان تەحنولوگيا دالاعا تاستالعان قالدىقتى انىقتاۋعا جانە ونى جەدەل جويۋعا مۇمكىندىك بەرەدى.
«سونداي-اق وپەراتور تاراپىنان ارالاس تۇردەگى قاپتاما قالدىقتارىن، قوڭىر ءتۇستى شىنى ىدىس قالدىقتارىن، پلاستماسسا (پوليەتيلەن، پوليپروپيلەن) قالدىقتارىن وڭدەيتىن كاسىپورىن قۇرىلىسىن سالۋعا قارجى ءبولۋ مۇمكىندىگى قاراستىرىلدى. سونىمەن قاتار وپەراتور ستراتەگياسىندا بۇگىنگى كۇندە قىزمەت ەتىپ وتىرعان باعىتتاردى ىنتالاندىرۋعا قولداۋ كورسەتىلە بەرەتىندىگى بەلگىلەنگەن. ناقتى ايتقاندا ەسكى كولىكتەردى تاپسىرۋ باعدارلاماسىن ىنتالاندىرۋ، ەلەكتر قۋاتتاۋ بەكەتتەرىنىڭ ينفراقۇرىلمىن دامىتۋ، و ك م تارالاتىن ءونىم قالدىقتارىن جيناۋعا جانە قايتا وڭدەۋگە جۇمسالاتىن وتەماقىنى بەرۋگە، ەكولوگيالىق تازا كولىكتەردى شىعارۋ ءوندىرىسىن ىنتالاندىرۋعا قولداۋ كورسەتىلەتىندىگى بەلگىلەنگەن» دەپ حابارلايددى «و ك م وپەراتورى» ج ش س باسپا ءسوز قىزمەتى.
قوعامدىق كەڭەس مۇشەلەرى تۇرمىستىق قالدىقتاردىڭ قوقىس پوليگوندارىنا كومۋدى شەكتەۋ، ونى قايتا وڭدەۋ، زاڭسىز قوقىس الاڭدارىنىڭ پايدا بولۋىنا جول بەرمەۋ شارالارى ەڭ وزەكتى ستراتەگيالىق باعىت ەكەندىگىن اتاپ ءوتتى. سوندىقتان قازاقستاندا قالدىق باسقارۋ جۇيەسىن جانە قايتا وڭدەۋ سالاسىنداعى ينفراقۇرىلىم جەدەل دامىتۋدى قاجەت ەتەدى.
ەسكەرتۋلەر مەن ۇسىنىستار تولىق ەسكەرىلگەن ستراتەگيانى ەكولوگيا، گەولوگيا جانە تابيعي رەسۋستار مينيسترلىگى بەكىتتى. بۇگىنگى تاڭدا اتالعان شارالاردى جۇزەگە اسىرۋ بويىنشا جوسپارلار ازىرلەنەدى.
