سولتۇستىك قازاقستان حالقىن پارا بەرۋگە نە يتەرمەلەيدى - زەرتتەۋ

ۆەدومستۆو باسپا ءسوز قىزمەتىنىڭ اقپاراتىنا سەنسەك، «قازاقستانداعى جەمقورلىقتىڭ جاعدايىنا مونيتورينگ» الەۋمەتتىك ساۋالناماسىنىڭ ناتيجەسى وسىلاي دەۋگە تولىق نەگىز بولا الادى. ونى «Transparency Kazakhstan»  قوعامدىق قورى جۇرگىزەدى. ساۋالناماعا وبلىس، قالا جانە اۋدان ورتالىقتارىنان 700 گە جۋىق رەسپوندەنت قاتىسىپ، جاۋاپ بەرگەن. سونداي-اق، «اشىق ديالوگ» پورتالىنا كەلىپ تۇسكەن 568 ءوتىنىش زەردەلەنگەن.

« قىزىلجار - ادالدىق الاڭى» جوبالىق كەڭسەسىنىڭ جەتەكشىسى ەكاتەرينا ستاروستينانىڭ ايتۋىنشا، وبلىس جەمقورلىق فاكتىلەرىنىڭ جيىلىگى بويىنشا ورتاشادان تومەن ناتيجە كورسەتكەن.

ساۋالناما سۇراقتارىنا جاۋاپ بەرگەن پەتروپاۆل قالاسى مەن اققايىڭ اۋدانى كاسىپكەرلەرىنىڭ جارتىسى جەمقورلىقتىڭ اسا كەڭ تارالماعانىن ايتقان. الايدا ولار مەملەكەتتىك قىزمەتتەردى الۋدا سىبايلاس جەمقورلىق سحەمالارىن پايدالانۋ شارۋانى جىلدام شەشۋگە كومەكتەسەتىنىن جوققا شىعارمايدى. جامبىل اۋدانىنان قاتىسقان رەسپوندەنتتەردىڭ 80 پايىزى دا وسىنداي پىكىردە. ال ەندى قاتىسۋشىلاردىڭ 7 پايىزى جەمقورلىق كۇندەلىكتى تىرشىلىكتىڭ اجىراماس بولىگىنە اينالعانىن مويىنداعان.

«زەرتتەۋ ناتيجەسىنە سەنسەك، رەسپوندەنتتەردىڭ 58 پايىزى مەملەكەتتىك قىزمەتتەردى الۋدا پارانى حالىقتىڭ ءوزى ۇسىناتىنىن ايتقان. ال 23 پايىزى اراداعى دەلدالدار وزدەرى اقشا سۇراپ، مازانى الاتىنىن كورسەتتى. قالعان 18 پايىزى جەمقورلىققا سول مەكەمەنىڭ قىزمەتكەرلەرى يتەرمەلەيدى دەيدى»، - دەپ اتاپ ءوتتى ە. ستاروستينا.

ساۋالناماعا جاۋاپ بەرگەندەردىڭ قاي- قايسىسى بولسا دا، كەيدە مەمورگان قىزمەتكەرلەرى ماسەلەنى شەشپەي، ادەيىلەپ سوزباقتاپ ءجۇرىپ الاتىنىن راستايدى. ولاردىڭ ويىنشا، وسى فاكتور جەمقورلىق جاعدايلارىنا الىپ كەلەدى. حالىق شارۋاسىن جىلدام جانە قيىنداتپاي، ۋاقتىلى تىندىرۋ ءۇشىن «سىيلىق» بەرۋگە ءماجبۇر بولادى.

ە. ستاروستينا اتالمىش ساۋالناما ناتيجەسى الدىن الا شارا قولدانۋ ءۇشىن مەمورگاندارعا جولداناتىنىن دا ايتىپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى