تۇركىستان وبلىسىنىڭ باس پوليتسەيى حالىقتى قىلمىسپەن بىرلەسىپ كۇرەسۋگە شاقىردى
كەزدەسۋدە 8 ايدا اتقارىلعان جۇمىستار قورىتىندىلانىپ، تۇرعىنداردىڭ ساۋالدارىنا جاۋاپ بەرىلدى، دەپ حابارلايدى قازاقپارات ءتىلشىسى.
ەسەپ بەرۋ جيىنىندا دەپارتامەنت باستىعى وڭىردە اسا اۋىر قىلمىستار 32,9 پايىزعا، جەڭىل جانە اۋىرلىعى ورتاشا قىلمىستار 26,7 پايىزعا كەمىگەنىن ايتتى. سونداي-اق، قاراقشىلىق قىلمىسى 40 پايىزعا، ۇرلىق 31,6 پايىزعا تومەندەگەنىن جەتكىزدى. وعان قوسا، جول قوزعالىسى دا ۇنەمى باقىلاۋدا ەكەندىگىن، بۇل باعىتتا «اۆتوبۋس»، «قۇقىقتىق ءتارتىپ»، «جول قاۋىپسىزدىگى»، «ابايلاڭىز بالالار!»، «نازار اۋدارىڭىز، بالالار!» سەكىلدى جەدەل پروفيلاكتيكالىق ءىس-شارالار قارقىندى ىسكە اسىرىلۋدا دەپ اتاپ ءوتتى. ناتيجەسىندە، وبلىستا جول- كولىك وقيعالارى 16,5 پايىزعا تومەندەگەنمەن، جول اپاتى سالدارىنان قازا بولعاندار سانى 20 پايىزعا ارتقان.
«وبلىسىمىزدا مال ۇرلىعى بويىنشا 19 قىلمىستىق توپ قۇرىقتالدى. 700 گە جۋىق مال قىلمىسكەرلەردەن ايعاقتى زات رەتىندە الىنىپ، زاڭدى يەلەرىنە قايتارىلدى»، - دەدى قايرات دالبەكوۆ.
جيىنعا قاتىسقان تۇرعىندار ءتارتىپ ساقشىلارىنىڭ جۇمىسىنىڭ قيىندىعىن ايتىپ، قىزمەتكەرلەر سانىن كوبەيتۋدى سۇرادى. ورانعاي اۋىلىنان كەلگەن اقساقال ەلدىمەكەندەر اراسىنداعى ۇلكەن جولدا كولىكتەر وتە قاتتى جىلدامدىقپەن جۇرەتىنىن، وسى جەرلەرگە جول بەلگىلەرى مەن ءتارتىپ ساقشىلارىن كوپتەپ قويۋدى سۇرادى. ال، ماقتارال اۋدانىنان كەلگەن قاريا جول- قوزعالىسى ەرەجەسىن بۇزعان جاندارعا جازانى قاتاڭداتۋ كەرەك دەگەن پىكىرىن ءبىلدىردى. ءوز كەزەگىندە پوليتسيا گەنەرال-مايورى وسىنداي كوپتەگەن ماسەلەلەرگە تۇشىمدى جاۋاپتار بەردى. تۇرعىنداردىڭ ۇسىنىستارى مەن پىكىرلەرىن تىڭداپ، الداعى ۋاقىتتا ەسكەرەتىنىن جەتكىزدى.
«مەنىڭ باستى باعىتىمنىڭ ءبىرى - حالىققا قورعان بولاتىن قىزمەتكەرلەردى تاربيەلەۋ. سوندىقتان دا اشىق بولۋعا ۇمتىلعان پوليتسيا قىزمەتكەرلەرىمەن بىرگە وبلىسىمىزدىڭ قاۋىپسىزدىگى ءۇشىن كۇش بىرىكتىرۋگە، ءبىر-ءبىرىمىزدى مۇمكىندىگىنشە قولداۋعا شاقىرامىن. اركىم ءوز مال- مۇلكىنە مۇمكىندىگىنشە ساق بولىپ، قاراۋسىز قالدىرماسا، ۇرلىق ورىن العان جاعدايدا ۋاقىتىلى پوليتسەيلەردى حاباردار ەتسە دەگەن ۇسىنىسىم بار. كەز- كەلگەن ازامات ءۇشىن ەسىگىمنىڭ اشىق ەكەنىن، ءتىپتى الەۋمەتتىك جەلىدە دە تۇرعىندارمەن «كەرى بايلانىس، اشىقتىق» ورناتۋ ءۇشىن جەكە پاراقشا اشتىم. جاعدايدىڭ بارلىعىن ءوز باقىلاۋىمدا ۇستاۋعا تىرىسامىن»، - دەدى قايرات دالبەكوۆ.
اۆتور: اينۇر اقبايەۆا
