ەلىمىزدە استىق باعاسى قىمباتتادى

بىرەر كۇن بۇرىن بيىلعى بيدايدى ساتىپ الۋ باعاسىن جاريالاعان «ازىق- تۇلىك كەلىسىمشارت كورپوراتسياسى ۇلتتىق كومپانياسى» ا ق مەملەكەتتىك قورعا 1 ميلليون تونناعا دەيىن استىق قابىلداماق. استىقتىڭ تونناسى وتكەن جىلمەن سالىستىرعاندا شامامەن 15 مىڭ تەڭگەگە دەيىن قىمباتتادى.

«قىركۇيەك ايىنىڭ باسىندا ءبىز بيدايدىڭ تونناسىنا 62 مىڭ تەڭگە بەردىك. ترەيدەرلەر بىزگە قاراپ بىلتىرعى باعا - 65 مىڭ تەڭگەدەن الا باستادى. كەيىن بيىلعى ەگىن وراعىنا بايلانىستى، ءارى ديقاندار دا قىمباتتاتۋدى سۇراعاننان كەيىن سارالاي كەلە 70 مىڭ تەڭگەگە دەيىن كوتەردىك. 3 كلاستى بيدايدىڭ تونناسىن ساپاسىنا قاراي 76 مىڭ تەڭگەگە دەيىن، 4 كلاستى استىقتى 65 مىڭ تەڭگەدەن الامىز. بيىل 5-كلاستى بيدايدى قۇس فەرمالارىنىڭ سۇرانىسىنا قاراي جەمازىققا 55 مىڭ تەڭگەدەن قابىلداپ جاتىرمىز» ، - دەيدى «ازىق- تۇلىك كەلىسىمشارت كورپوراتسياسى ۇ ك» ا ق سقوف ديرەكتورى رامازان ءاسىپ.

ازىق- تۇلىك كەلىسىمشارت كورپوراتسياسىنىڭ ساتىپ الاتىن استىققا قاتىستى ءبىرقاتار تالاپتارى بار. ماسەلەن، 3 كلاستى بيدايدىڭ ىلعالدىلىعى - 14, ال قۇرامىنداعى كىلەگەي مولشەرى - 23 پروتسەنتتەن كەم بولماۋى ءتيىس. ال 4-كلاستى بيدايدىڭ ناتۋراسى - 700, كىلەگەيلىگى 20 جانە ىلعالدىلىعى 14 پروتسەنتتەن اسپاعان جاعدايدا تونناسى 65 مىڭ تەڭگەدەن الىنادى. قازىردىڭ وزىندە ۇلتتىق كومپانيا 2 مىڭ توننادان استام بيداي ساتىپ الدى.

جالپى بيىل ەل بويىنشا مەملەكەتتىك قورعا 1 ميلليون تونناعا دەيىن استىق قابىلداۋ جوسپارلانعان. وسى ماقساتتا س ق و- دا 12 ەليەۆاتورمەن كەلىسىمشارت جاسالدى. بۇل - ديقاندارعا دا ءتيىمدى بولماق. كورپوراتسياعا استىعىن ساتقان اۋىل شارۋاشىلىعى تاۋارىن وندىرۋشىلەر ءوز بيدايىن مۇندا ەش كەدەرگىسىز، كەزەكسىز وتكىزە الادى. ال كەلەسى جىلى ۇلتتىق كومپانيا ديقانداردان ءونىمدى فورۆاردتىق كەلىسىم بويىنشا الماق. ياعني شارۋالارعا تۇقىم، جاعارماي الۋعا بولاشاق استىق ەسەبىنەن كەپىلسىز نەسيە بەرىلەدى.

اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى