ۇزىلگەن ءانۇران: جانكۇيەرلەرىن تەبىرەنتكەن جاسوسپىرىم قىزدار ەلگە قاشان ورالادى

بۇل تۋرالى قازاقپارات تىلشىسىنە سۋ دوبىنان ۇلتتىق قۇراما كومانداسىنىڭ باسشىسى نازيرا شاگيروۆا ايتىپ بەردى.

«ءۇندىستاننىڭ بەنگالۋرۋ قالاسىندا سۋ سپورتى تۇرلەرىنەن جاسوسپىرىمدەر اراسىنداعى ازيا چەمپيوناتى 3 - قازانعا دەيىن جالعاسادى. الايدا، جارىستى اياقتاعان قۇراما مۇشەلەرىنىڭ الدى 2 - قازان كۇنى ەلگە ورالادى. ولاردىڭ اراسىندا جارىس بارىسىندا تەحنيكالىق اقاۋ ورىن الىپ، ءۇزىلىپ قالعان ءانۇرانىمىزدى ورىنداپ شىققان كىشكەنتاي ارۋلارىمىز دا بار»، - دەپ اتاپ ءوتتى ول.

سونداي- اق، سپورتشىلاردىڭ ەلىمىزدىڭ قاي قالاسىنا ۇشىپ كەلەتىنى دە ناقتىلاندى.

«وزدەرىنىڭ ناعىز پاتريوت ەكەنىن سوزبەن ەمەس، ناقتى ىسپەن دالەلدەپ، بارشا جانكۇيەرلەردى تەبىرەنتكەن 13 قىزىمىز سول العاشقى لەكپەن بىرگە 2 - قازان كۇنى، تۇستەن كەيىن ساعات 16:00 شاماسىندا ەلوردامىزداعى حالىقارالىق اۋەجايعا كەلىپ قونادى. قارسى الامىز دەگەن بۇكىل جانكۇيەرلەردى سول كۇنى قۋانا- قۋانا اۋەجايدا كۇتەمىز»، - دەدى نازيرا ەرىك قىزى.

سونىمەن قاتار، نازيرا شاگيروۆا ءار سپورتشىنىڭ مەملەكەتتىك ءانۇرانىمىزدى جاتقا ءبىلۋى - ولاردىڭ ازاماتتىق بورىشى ەكەنىن دە تىلگە تيەك ەتتى.

«ءبىزدىڭ ءار سپورتشىمىز مەملەكەتتىك ءانۇرانىمىزدى ازاماتتىق بورىشى رەتىندە جاتقا ءبىلۋى ءتيىس دەپ ەسەپتەيمىن. وزدەرىڭىز كورگەندەي، توسىننان بولعان وقيعاعا قاراماستان قىزدارىمىز ءبىر داۋىستان ءانۇرانىمىزدى ەركىن ورىنداپ شىقتى»، - دەدى ول.

ەستەرىڭىزگە سالا كەتەيىك، وسىعان دەيىن سۋ دوبىنان قازاقستان مەن قىتاي كوماندالارى اراسىنداعى ويىن الدىندا بولعان جاعداي تۋرالى جازعان بولاتىنبىز. دىبىستىق جابدىقتىڭ تەحنيكالىق اقاۋىنا بايلانىستى ق ر گيمنى 8 سەكۋندتا كەنەتتەن ءۇزىلىپ كەتىپ، سول تۇستا قازاقستان جاسوسپىرىمدەر قۇراماسى ابىرجىماي، ءوز داۋسىمەن ءانۇراندى سوڭىنا دەيىن ايتىپ شىقتى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى