الماتىلىق ستۋدەنتتەرگە ءداستۇرلى ءدىن ۇعىمى ءتۇسىندىرىلدى
مەديتسينالىق كوللەدج ستۋدەنتەرىنە ءدارىستى ءدىنتانۋشى ميراس قونىسبەك ۇلى وقىدى. ەڭ الدىمەن ول حاق ءدىنىمىز يسلامنىڭ قۇندىلىقتارى جايىندا وي ءوربىتىپ، ءدىن مەن ءداستۇر ساباقتاستىعىن كەڭىنەن قامتىپ ءوتتى.
«اتا- بابالارىمىز ۇستانىپ كەلگەن اسىل ءدىنىمىزدىڭ رۋحاني قۇندىلىقتارىنا نەگىزدەلگەن، شاريعاتقا ەش قايشى كەلمەيتىن ۇلتتىق ۇردىسىمىزدەن، سالت داستۇرىمىزدەن اينىماي، كەرىسىنشە، قادىرلەي ءبىلۋىمىز كەرەك. ءدىننىڭ نەگىزگى قاعيدالارىن بىلمەستەن وزگە ەلدىڭ ءومىر سالتىنا، كيىم ۇلگىسىنە ەلىكتەپ، ءوز ۇلتىنىڭ رۋحاني باستاۋىنان جەرىنۋدىڭ ءوزى اداسۋشىلىققا اپارىپ، دەسترۋكتيۆتى كوزقاراس قالىپتاستىرادى»، - دەدى ءدىنتانۋشى ميراس قونىسبەك ۇلى.
ءدىن تانۋشى ەلىمىزدەگى ءدىني احۋالعا توقتالىپ، حريستيان باعىتىنداعى ءدىني اعىمدار مەن سەكتالار جانە ولاردان كەلەتىن قاۋىپ- قاتەر جايىندا جان- جاقتى جاستارعا ءتۇسىندىرىپ بەردى.
«ماسەلەن، «يەگوۆا كۋاگەرلەرى» ءدىني بىرلەستىگىنە الەمنىڭ 35 مەملەكەتىندە تىيىم سالىندى. وسىدان ءبىر جىل بۇرىن رەسەي مەملەكەتىندە اتالمىش ءدىني ۇيىمنىڭ جۇمىسى توقتاتىلدى. وكىنىشكە وراي سول «يەگوۆا كۋاگەرلەرى» بىرلەستىگىنىڭ قاتارىندا ءوزىمىزدىڭ قاراكوزدەر دە بولدى. تەرىس اعىمنىڭ جەتەگىندە كوبىنەسە جاستار، جان- دۇنيەسى كۇيزەلىپ جۇرگەن جاندار كەتەتىنى بەلگىلى»، - دەدى ول.
قاۋىپ- قاتەردىڭ الدىن الۋ ماڭىزدىلىعىنا ايرىقشا توقتالعان ءدىن مامانى جاستاردى سالاماتتى دا ساۋاتتى ءومىر سۇرۋگە شاقىردى.
«بۇگىندە ادامنىڭ وي- ساناسىنا اسەر ەتەتىن اقپارات تاسقىنى عالامتور كەڭىستىگى ارقىلى اعىلىپ كەلىپ جاتقانى بەلگىلى. ەكسترەميستىك يدەيالاردى ناسيحاتتايتىن سايتتاردىڭ قولجەتىمدىلىگى دە ارام پيعىلدى توپتارعا ءتيىمدى بولىپ وتىر. سوندىقتان سىزدەر - جاستار ءدىن ماسەلەسىنە قاتىستى ساۋالدارعا جاۋاپتى قاۋىپتى سايتتار مەن كەزدەيسوق جانداردان ەمەس مەشىت يمامدارىنان نەمەسە ق م د ب- نىڭ رەسمي سايتتارىنان الۋ كەرەكسىزدەر»، - دەپ قورىتىندىلادى ميراس قونىسبەك ۇلى.
كەزدەسۋ سوڭىندا ستۋدەنتتەر ءدىن تاقىرىبىنا قاتىستى وزدەرىن تولعاندىرىپ جۇرگەن ساۋالدارىن قويىپ، مامان تاراپىنان تۇشىمدى جاۋاپ الدى.
اۆتور: الما مۇقانوۆا
