ۇلىقبەك ەسداۋلەت: بەيىمبەت - الىپتار شوعىرىن باستاۋشىلاردىڭ بىرەگەيى
«بەيىمبەت مايليننىڭ مۇراسى - ۇلتتىڭ اسىل قازىناسى» عىلىمي-پراكتيكالىق كونفەرەنتسياسىندا قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ءسوز سويلەپ، بەيىمبەت مايليننىڭ قازاق ادەبيەتى مەن قوعامدىق ومىرىندەگى ەڭبەگى تۋرالى ءسوز ەتتى.
«بەيىمبەت مايلين - قازاق جازبا ادەبيەتىنىڭ باسىندا تۇرعان ادام. الىپتاردىڭ شوعىرىن باستاۋشىلاردىڭ بىرەگەيى. سوندىقتان دا بۇل شارانىڭ ماڭىزى بولەك. ءبي- اعاڭ ءوز داۋىرىندەگى شىندىقتى جەرىنە جەتكىزە سۋرەتتەدى. اسىرەسە، حالىقتىڭ باسىنا تۋعان الماعايىپ كەزەڭ - اشارشىلىقتى بارىنشا شىنشىل بەينەلەدى. قازاق ۇلتىنىڭ تاعدىرىنا كەسە-كولدەنەڭ تۇرعان ناۋبەتتەر جازۋشى نازارىندا بولدى. ول اقيقاتتى بۇكپەسىز ايتتى. قازاق پروزاسىنداعى اڭگىمە جانرىنىڭ نەگىزىن سالعان ەكى ادامنىڭ ءبىرى وسى بەيىمبەت مايلين ەدى. ونىڭ اڭگىمەلەرى ءومىر شىندىعىن ءدوپ باستى. شىعارمالارىنىڭ رەاليستىك تەگەۋرىنى، كوركەمدىك بيىك ورەسى، تاقىرىبىنىڭ ارالۋاندىعىمەن دارالاندى. ءوزى ءومىر سۇرگەن قوعامدى اڭگىمەلەرىنە ارقاۋ ەتىپ، ەنتسيكلوپەديالىق كەمەلدىكپەن سومداي ءبىلدى. مىنە، ءبىز ءبي-اعاڭا وسى ءۇشىن دە قارىزدارمىز»، - دەدى ۇلىقبەك ەسداۋلەت.
سونىمەن قاتار، جازۋشىلار وداعىنىڭ ءتوراعاسى 80 جىل بويى تاران ەسىمىن يەلەنىپ كەلگەن اۋدان ورتالىعىنا ونىڭ تاريحي اتاۋى قايتارىلعانىن اتاپ ءوتتى.
كونفەرەنتسيادا بەيىمبەت مايلين كەزىندە جاۋاپتى حاتشى بولعان رەسپۋبليكالىق «ەگەمەن قازاقستان» گازەتىنىڭ باس رەداكتورى ايبىن شاعالاقوۆ پەن ق ر ب ع م مەملەكەت تاريحى ينستيتۋتىنىڭ جەتەكشى عىلىمي قىزمەتكەرى قۇندىزاي ەرىمبەتوۆا، تاعى باسقا ەلىمىزدىڭ تۇكپىر-تۇكپىرىنەن كەلگەن زيالى قاۋىم، ادەبيەتشىلەر مەن تاريحشىلار ءسوز سويلەپ، ءبي- اعانىڭ كوپشىلىك بىلە بەرمەيتىن قىرلارىن اڭگىمەلەدى.
شارا سوڭىندا بيىلدىڭ وزىندە اۋداننىڭ الەۋمەتتىك-ەكونوميكالىق دامۋىنا 12 ميلليون تەڭگە باعىتتاعان «مايلين» ج ش س ديرەكتورى، مەتسەنات، بيىلعى «جومارت جۇرەك» جوباسىنىڭ «جىل تۇلعاسى» اتانعان پەتر بۋشكينگە بەيىمبەت مايلين اتىنداعى قور ارنايى مەرەيتويلىق توسبەلگىسىن تابىستادى.
