ۋكراينا پرەزيدەنتىمەن تەلەفون ارقىلى سويلەسەم دەپ دونالد ترامپتىڭ باسى داۋعا قالدى

سەبەبى، امەريكالىق كوشباسشى ۋكراينا پرەزيدەنتى ۆلاديمير زەلەنسكيمەن تەلەفون ارقىلى سويلەسكەن كەزدە سايلاۋداعى قارسىلاسى دجو بايدەننىڭ ۇلىنا قاتىستى تەرگەۋ باستاۋىن تالاپ ەتكەن. بۇل وقيعا دەموكراتتار مەن رەسپۋبليكالىقتاردىڭ اراسىنا وت سالدى. ءتىپتى وكىلدەر پالاتاسى مەملەكەت باسشىسى لاۋازىمىن اسىرا پايدالانىپ، ۇلتتىق قاۋىپسىزدىككە قاتەر ءتوندىردى دەپ وتىر.

ۆلاديمير زەلەنسكيمەن تەلەفون ارقىلى سويلەسەم دەپ دونالد ترامپتىڭ باسى داۋعا قالدى. ەندى اق ءۇي باسشىسى مەرزىمىنەن بۇرىن ورىنتاعىنان ايرىلىپ، ءتىپتى جاۋاپقا تارتىلۋى مۇمكىن. وكىلدەر پالاتاسىنىڭ سپيكەرى نەنسي پەلوسي وسىلاي دەيدى.

  نەنسي پەلوسي، ا ق ش وكىلدەر پالاتاسىنىڭ سپيكەرى:

- پرەزيدەنتتىڭ ارەكەتتەرى ەلىمىزدىڭ كونستيتۋتسياسىنا قايشى. ءتىپتى «ويىما كەلگەندى ىستەيمىن» دەۋى لاۋازىمىن اسىرا پايدالاندى دەگەندى بىلدىرەدى. سوڭعى بىرنەشە اي بويى ءبىزدىڭ كوميتەت يمپيچمەنتتى ىسكە قوسۋ ءۇشىن زەرتتەۋلەر جۇرگىزدى. ال، وسى اپتادا مەملەكەت باسشىسىنىڭ ءوزى ۋكراينا پرەزيدەنتىنەن بايدەنگە قارسى تەرگەۋ باستاۋىن سۇراعانىن مويىندادى. ترامپ بۇل ارقىلى ەلگە بەرگەن انتىنا، ۇلتتىق قاۋىپسىزدىككە، سايلاۋ ينستيتۋتىنا وپاسىزدىق جاساپ وتىر.

 25 - شىلدە كۇنگى قوڭىراۋعا بايلانىستى ەندى بىرنەشە تەرگەۋ جۇمىستارى جۇرگىزىلۋى مۇمكىن. سەبەبى كونگرەسستىڭ مالىمدەۋىنشە، ترامپ ۋكراينا پرەزيدەنتىنەن ءوزىنىڭ سايلاۋداعى قارسىلاسى دجو بايدەننىڭ وتباسىنا قاتىستى تەرگەۋ باستاۋدى تالاپ ەتكەن. ونىڭ ورنىنا زەلەنسكيگە اسكەري كومەك كورسەتەمىن دەپ ۋادە بەرسە كەرەك.

ۆلاديمير زەلەنسكي، ۋكراينا پرەزيدەنتى:

 - مەن ا ق ش پەن ۋكراينا اراسىنداعى قارىم- قاتىناس وتە جوعارى دەڭگەيدە بولارىنا سەنىمدىمىن. دونالد ترامپتى ىسساپارمەن كيەۆكە شاقىرعىمىز كەلەدى. ول كوپ جىلدار بويى ۋكرايناعا كەلمەپتى. سوندىقتان الداعى ۋاقىتتا رەسمي ءىسساپار تۋرالى ورتاق كەلىسىمگە كەلەمىز دەپ ويلايمىن.

ترامپتىڭ ءوزى تەلەفون ارقىلى اڭگىمە كەزىندە ەشقانداي زاڭ بۇزباعانىن ايتادى. ءتىپتى قوڭىراۋدىڭ تولىق نۇسقاسىن جاريالايمىن دەپ ۋادە ەتتى. كيەۆ تە «ەشقانداي قىسىم كورگەن جوقپىز» دەپ وتىر. ال، اق ءۇي باسشىسى يمپيچمەنت پروتسەسىنىڭ باستالۋى تۋرالى ب ۇ ۇ ساپارى كەزىندە جۋرناليستەردەن ەستىدى.

 دونالد ترامپ، ا ق ش پرەزيدەنتى:

- مەن يمپيچمەنت تۋرالى ءالى ەستىمەدىم. دەگەنمەن، دەموكراتتاردىڭ ادەتتەگى جالاسى بۇل. ا ق ش - الەمدەگى ەڭ مىقتى مەملەكەت. ەكونوميكالىق كورسەتكىشتەرىمىز دە ەڭ جوعارعى دەڭگەيدە. ال، نەنسي پەلوسي بولسا، يمپيچمەنت تۋرالى ايتىپ تۇر. ول ءالى قوڭىراۋدىڭ تولىق نۇسقاسىن تىڭداپ كورمەگەن. وندا ەشقانداي زاڭعا قايشى ارەكەت بولعان جوق. دجو بايدەننىڭ ۇلىنا قاتىستى ايتارىم. ول ۋكراينا مەن قىتايدان ميلليون دوللارلاپ اقشا الىپ كەلگەن. نەگە سول تۋرالى ايتپايدى؟ ماسقارا عوي بۇل.

ترامپقا قارسى يمپيچمەنتكە قاتىستى ا ق ش تۇرعىندارىنىڭ دا پىكىرى ەكىۇشتى.

- يمپيچمەنت ءدال قازىرگى ساياساتتا ورىنسىز دەر ەدىم. كونگرەسس ۇكىمەتتى باسقارىپ، ناقتى ماسەلەلەردى شەشۋمەن اينالىسۋى كەرەك. ءبىر ادامنىڭ ىزىنە ءتۇسۋ، نەگىزسىز دەر ەدىم.

- ترامپقا قارسى يمپيچمەنت 2016 -جىلى باستالۋى كەرەك ەدى. وعان قارسى ايعاقتار جەتەرلىك. نەنسيدىڭ باستاماسىن قولدايمىن.

 ازىرگە يمپيچمەنتتىڭ جۇزەگە اسۋ- اسپاۋى ەكىتالاي. ويتكەنى پروتسەسس ىسكە قوسىلعاننىڭ وزىندە جوعارى پالاتاعا جولدانادى. ال، سەناتتاعى باسىمدىق رەسپۋبليكالىقتاردا. بۇعان دەيىن ا ق ش تاريحىندا ءۇش پرەزيدەنتكە قارسى يمپيچمەنت جاريالانعان. ءبىراق بارلىعى ناتيجەسىز اياقتالعان ەدى.

ەگەر دەموكراتتاردىڭ بۇل باستاماسى قولداۋ تاپپاسا، دونالد ترامپ بۇدان تەك پايدا كورەدى. پرەزيدەنتتىك سايلاۋعا 400 كۇن قالعان ۋاقىتتا باستى قارسىلاسى دجو بايدەننىڭ رەيتينگى تومەندەيتىنى دە ءسوزسىز.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى