ماڭعىستاۋدا تانك سايىسى ءوتتى
تانكىشىلەر الدىمەن، ت-72 تانكىسىنىڭ قارۋىنان دالدەۋ شەبەرلىكتەرىن كورسەتىپ، ەكيپاجدار وق اتۋ بويىنشا ءبىرىنشى جاتتىعۋدى ورىندادى.
سايىس بارىسىندا ساربازدار 1600 مەتر قاشىقتىقتان 900 مەترگە دەيىنگى قاشىقتىقتان تانكىگە قارسى گراناتا اتقىش پەن زەڭبىرەك جانە 700 مەتردەن تانكىگە قارسى گراناتا اتقىشپەن وق اتۋ ونەرىن پاش ەتتى. ودان باسقا، اسكەريلەر تانكىگە اتىس جيىنتىعىن سالۋ، تانكتىڭ بولىمشەسى مەن قارۋ-جاراعىن جورىقتىق قالىپتان جاۋىنگەرلىككە جانە كەرى قاراي كوشىرۋ جونىندەگى پراكتيكالىق نورماتيۆتەردى ورىندادى.
وق اتۋ جاتتىعۋىن وتكىزۋدىڭ باستى ماقساتى اسكەري قىزمەتشىلەردىڭ جاۋىنگەرلىك دايارلىق دەڭگەيىن ارتتىرۋ، ساربازداردىڭ شتاتتىق قارۋ-جاراقتان وق اتۋ شەبەرلىكتەرىن جەتىلدىرۋ، اتىستى باسقارۋدى دۇرىس ۇيىمداستىرۋداعى پراكتيكالىق ماشىقتى يگەرۋ بولدى.
وق اتۋ جاتتىعۋىنىڭ قورىتىندىسى بويىنشا 2- تانك روتاسىنىڭ كومانديرى اعا لەيتەنانت ازامات قوندىبايەۆتىڭ جەكە قۇرامى بارلىق ءتيىستى نورماتيۆتەردى ساپالى ءارى جىلدام ورىنداپ، بارلىق نىسانالارعا ءدوپ تيگىزدى. ۇزدىك تانك كومانديرى رەتىندە سەرجانت سەيتقوجا ءابدۋعازيز تانىلدى.
