قازاقستاندىقتارعا دەتەكتيۆ جانرىندا تۇسىرىلگەن تەلەحيكايا ۇسىنىلادى
جۇمىس كۇندەرى «قاشقىن» اتاۋىمەن ەفيرگە شىعاتىن تۋىندى قوعامنىڭ وزەكتى ماسەلەسىنە اينالىپ وتىرعان جەمقورلىق، تەرىس ءدىني اعىمداردىڭ اسەرى، ءداستۇردىڭ قۇنسىزدانۋى، وتباسى قۇندىلىقتارى سياقتى سان ءتۇرلى تاقىرىپتاردى ارقاۋ ەتەدى.
سونىمەن قاتار، تەلەحيكايا بۇگىنگى زامانداعى قۇقىق قورعاۋ وكىلدەرىنىڭ اسا قاۋىپتى قىلمىسكەرلەردىڭ جولىن كەسۋدەگى كاسىبي جۇمىسى مەن قوعام الدىنداعى اۋىر مىندەتىن اشىپ كورسەتەدى.
«جەمقورلىق پەن اشكوزدىك جايلاعان قوعامدا سەنىم، بىرلىك، باۋىرمالدىلىق جوعالادى. جاڭا تۋىندى بيىك ادامگەرشىلىك قاسيەت پەن ادال ەڭبەك جولى عانا قوعامدى جاقسىلىققا جەتەلەيتىنىن، ادامي وركەنيەتتىڭ نەگىزى تازا جولمەن قىزمەت ەتۋ ەكەنىن اشىپ كورسەتۋدى ماقسات تۇتادى.
تەلەحيكاياداعى وڭاي جەردەن ولجا ىزدەگەن جاننىڭ قايشىلىققا تولى، جاعىمسىز ءومىرىن بەينەلەۋ ارقىلى وزگەلەرگە وي سالۋدى كوزدەدىك. تۋىندىنىڭ نەگىزگى يدەياسى - اينالاسىنا زيانىن تيگىزەتىن ادامنىڭ ءومىرى تىعىرىققا تىرەلەتىنىن، زاڭ ادىلدىگىنىڭ قاي كەزدە دە ۇستەمدىك قۇراتىنىن كورسەتۋ»، - دەيدى «قازاقستان» ۇ ت ا ەفيرلىك ساياسات ديرەكسياسىنىڭ ديرەكتورى باعجان بيمۇراتوۆا.
باستى رولدەردى ق ر حالىق ءارتىسى تىلەكتەس مەيراموۆ، ق ر ەڭبەك سىڭىرگەن قايراتكەرى باۋىرجان قاپتاعاي، بەلگىلى كينو جانە تەاتر اكتەرلەرى قۋاندىق قىستاقبايەۆ، جانداربەك سادىربايەۆ، باقىت تۋشايەۆ، نىشانبەك جۇبانايەۆ، نۇرلان جۇماعالي، نارتاي ساۋدانبەك ۇلى سومدايدى.
تەلەحيكايا «قازاقستان» ۇلتتىق تەلەارناسىنان 26 - قىركۇيەكتەن باستاپ جۇمىس كۇندەرى 21:30-دا كورسەتىلەدى.
ايتا كەتسەك، «قازاقستان» تەلەراديوكورپوراتسياسى بيىلعى جىلى جالپى سانى 2019 بولىمنەن تۇراتىن ءتۇرلى جانرداعى 14 جاڭا وتاندىق تەلەحيكايا ءتۇسىردى. بۇگىنگى كۇنگە دەيىن ۇسىنىلعان «47 بالانىڭ اناسى»، «قاناتسىز قۇستار» تەلەحيكايالارى كورەرمەن تاراپىنان جوعارى باعاعا يە بولىپ ۇلگەردى.
