التى ەلدىڭ جەلاياقتارى قاراعاندىداعى كۇزگى جارتىلاي مارافونعا قاتىستى

جارتىلاي مارافون باعدارلاماسىنا ءۇش قاشىقتىق كىردى: 21 شاقىرىم 97,5 مەتر، 14 شاقىرىم جانە 7 شاقىرىم.

شارا تاۋەلسىزدىك الاڭىندا باستاۋ الىپ، ۇلكەن شەڭبەردەن سوڭ قايتا سول جەردە مارەگە جەتتى. قاراعاندى وبلىسى اكىمىنىڭ ورىنباسارى ابزال نۇكەنوۆ جۇگىرۋدىڭ باستالۋىنا بەلگى بەردى. مارەدەن كەيىن ول 7 شاقىرىم قاشىقتىقتاعى ءبىرىنشى جەڭىمپاز اتانعان ەڭ جىلدام قىزدارعا مەدالدار مەن گراموتالاردى تابىس ەتتى.

جارتىلاي مارافوننىڭ قاتىسۋشىلارى تراسسانى ەڭسەرگەنشە، كورەرمەندەر مەن قوناقتار سپورتشىلاردى تاماشالاي الدى. تاۋەلسىزدىك الاڭىندا سپورتتىق-كونسەرتتىك شوۋ ۇيىمداستىرىلدى.

ەرلەر اراسىنداعى باستى جارىستا قاراعاندىلىق ۆياچەسلاۆ سلابادەنيۋك جەڭىمپاز اتاندى. ول كۇزەتشى بولىپ جۇمىس ىستەيدى، جۇگىرۋ - ونىڭ حوببيى.

«جۇمىستان كەيىن كەشكە جۇگىرۋگە شىعامىن. الدىمەن 14-15 شاقىرىمنان جۇگىرىپ ءجۇردىم، قازىر 30 شاقىرىمدى ەڭسەرەمىن. بىزدە جۇگىرۋ اۋەسقويلارىنىڭ كومپانياسى بار. وندا 23-47 جاس ارالىعىنداعى التى ادام جينالعان»، - دەيدى ۆياچەسلاۆ سلابادەنيۋك.

كەلەسى جىلدىڭ مامىر ايىندا ول Аrmanga Jol جارتىلاي مارافونىنا قاتىسۋعا نيەتتى.

ايەلدەر اراسىندا باستى قاشىقتىققا جۇگىرۋدە ءبىرىنشى بولىپ مارەگە نۇر-سۇلتاننان كەلگەن اسەل قۇسپانوۆا جەتتى.

بارلىق قاتىسۋشىلار شارانىڭ جوعارى دەڭگەيدە ۇيىمداستىرىلعانىن اتاپ ءوتتى. الداعى ۋاقىتتا كۇزگى جارتىلاي مارافون جىل سايىن وتكىزىلەدى دەپ جوسپارلانۋدا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى