ستەپنوگوردا كۇش اتاسى قاجىمۇقانعا ەسكەرتكىش ورناتىلدى
بۇل تۋرالى قالا اكىمى ەركەبۇلان باياحمەتوۆ Facebook پاراقشاسىندا جازدى، دەپ حابارلايدى قازاقپارات ءتىلشىسى.
ستەپنوگور قالاسىنىڭ 55 جىلدىعىن مەركەلەۋ شەڭبەرىندە سپورت سارايىنىڭ الىندا ورناتىلعان ەسكەرتكىشتىڭ اشىلۋىنا قالا اكىمى ەركەبۇلان باياحمەتوۆ، اقمولا وبلىستىق ءماسليحاتىنىڭ حاتشىسى الىبەك بايماعامبەتوۆ جانە ءمۇسىننىڭ اۆتورى - قازاقستان سۋرەتشىلەر وداعىنىڭ مۇشەسى، پروفەسسور ازات بايارلين قاتىسىپ، ءسوز سويلەدى.
ەسكەرتكىش گرانيتتەن جاسالعان. قولا ءمۇسىننىڭ بيىكتى - 2,5 مەتر، پوستامەنتىمەن قوسقاندا جالپى بيىكتىگى 4 مەتردى قۇرايدى. سالماعى - 23,5 توننا.
ەسكەرتكىشتىڭ اشىلۋىنان كەيىن قازاق كۇرەسىنەن رەسپۋبليكالىق جارىس، كروسس-كانتري «STCROSS» ۆەلوجارىسى ۇيىمداستىرىلدى.
سونىمەن قاتار قالانىڭ 55 جىلدىعىنا وراي، 5-شاعىن اۋداندا بالالاردىڭ سپورت-ويىن الاڭى اشىلدى. جوبا «رۋحاني جاڭعىرۋ» باعدارلاماسى جانە جاستار جىلى اياسىندا جۇزەگە اسىرىلىپ وتىر.
«سپورتتىق-ويىن الاڭى قالا جاستارى مەن بۇلدىرشىندەردىڭ دەمالىپ، بوس ۋاقىتىن وتكىزۋ ءۇشىن قاجەتتى كەرمە، اتكەنشەك سياقتى قۇرال-جاراقتارمەن جابدىقتالعان. سونداي-اق ۆولەيبول ويناۋعا ارنالعان الاڭدا قاراستىرىلعان»، - دەپ جازدى قالا اكىمى ەركەبۇلان باياحمەتوۆ Facebook پاراقشاسىندا.
