قازاقستاندا كۇزگى-قىسقى اڭشىلىق ماۋسىمى باستالادى
بۇل جايىندا ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز حاتشىسى ساكەن دىلداحمەت Facebook-تەگى پاراقشاسىندا جازدى، دەپ حابارلايدى قازاقپارات ءتىلشىسى.
ونىڭ دەرەگىنشە، اڭ اۋلاۋدىڭ نىسانىنا 34 ءسۇت قورەكتىنىڭ جانە 59 قۇستىڭ ءتۇرى جاتادى. اڭشىلىق رەسپۋبليكاداعى 701 اڭشىلىق شارۋاشىلىقتا وتەدى. قازاقستان رەسپۋبليكاسى اۋماعىنداعى اڭشىلىق مەرزىمى اڭ اۋلاۋ قاعيدالارى تۋرالى ق ر اۋىل شارۋاشىلىعى مينيسترلىگى بەكىتكەن 2015-جىلعى 27- اقپانداعى 18-03/157№ بۇيرىققا سايكەس وتكىزىلەدى.
قىركۇيەكتىڭ العاشقى سەنبىسىنەن باستاپ اڭشىلىق جانۋارلاردىڭ كەلەسى تۇرىنە رۇقسات ەتىلەدى: - مايماققاز، قاز، قاراشاقاز، ۇيرەك، قاسقالداق – 7- قىركۇيەكتەن باستاپ 30- قاراشاعا دەيىن سولتۇستىك وڭىرلەر بويىنشا، 15- جەلتوقسانعا دەيىن وڭتۇستىك وڭىرلەر بويىنشا؛ - شىل (اققۇر، تۋندرالىق، سۇر، دالا شىلى، ساقالدى شىل)، شىل -7- قىركۇيەكتەن 15- قاراشاعا دەيىن؛ - قۇر - 7- قىركۇيەكتەن 30- قاراشاعا دەيىن سولتۇستىك ايماقتار بويىنشا، 15- جەلتوقسانعا دەيىن وڭتۇستىك ايماقتار بويىنشا؛ - قوڭىر ايۋ (تيان-شان ايۋىنان باسقا) - 7- قىركۇيەكتەن سەنبىسىنەن 30- قاراشاعا دەيىن؛ - بورسىق - 7- قىركۇيەكتەن باستاپ 31 جەلتوقسانعا دەيىن؛ - مارال، اسكانيا بۇعىسى، قابان، قۇدىر، بۇلان - 7 قىركۇيەكتەن 31- جەلتوقسانعا دەيىن؛ - ءسىبىر تاۋ ەشكىسى - 7- قىركۇيەكتەن باستاپ 31- جەلتوقسانعا دەيىن.
«ورمان شارۋاشىلىعى جانە جانۋارلار دۇنيەسى كوميتەتىنىڭ 2016-جىلعى 24- قاراشاداعى 265№ بۇيرىعى بويىنشا كاسىپشىلىك اڭ اۋلاۋدان باسقا، ءبىر اڭشىعا شاققاندا جابايى قۇس پەن تەرىسى باعالى اڭنىڭ ءبىر ءتۇرىن الىپ قويۋدىڭ تاۋلىكتىك نورماسىن بەس داراققا دەيىن شەكتەۋ تۋرالى نورماسى بەكىتىلدى»، - دەپ جازدى ول.
