ادامدار قانداي تىرشىلىك يەلەرىنەن قورقادى؟
كەيدە فوبيا دەپ تە اتاپ ءجۇرمىز. سولاردىڭ ءبىرى - بەلگىلى ءبىر تىرشىلىك يەلەرىنەن قورقۋ. جۋىردا پراگاداعى كارلوۆ ۋنيۆەرسيتەتىنىڭ ماماندارى ادامدار قورقاتىن جانە ۇناتپايتىن تىرشىلىك يەلەرىنە قاتىستى ارنايى جۇرگىزگەن زەرتتەۋلەرىنىڭ قورىتىندىسىن شىعاردى. ول ناتيجە British Journal of Psychology باسىلىمىندا جاريالاندى. ارنايى زەرتتەۋگە 2000 نان استام ادام قاتىسقان. ولارعا جان- جانۋارلار الەمىنەن 25 سۋرەت كورسەتىلگەن.
ەرىكتىلەر قايسى تىرشىلىك يەسىنەن قورقاتىنىن، قايسى تىرشىلىك يەسىن ۇناتپايتىنىن ايتقان. قورىتىندىسىندا ادامدار ەڭ كوپ قورقاتىن تىرشىلىك يەسى ورمەكشى بولىپ شىققان. ولار ونىڭ سۋرەتىن كورگەننەن- اق سەسكەنگەن. ورمەكشىدەن قورقۋدى اراحنوفوبيا دەپ اتايدى. ەكىنشى ورىندا - جىلان. بۇل تىرشىلىك يەسىنەن دە سەسكەنبەيتىن جان كەمدە- كەم بولار. زەرتتەۋگە قاتىسقانداردىڭ ءبىرازى بۇقادان قورقاتىندارىن ايتقان. ادامدار ەڭ قورقاتىن تىرشىلىك يەلەرى وندىعىنا تاراقان، قۇمىرسقا، ارا، يت، ەگەۋقۇيرىق، جارعانات پەن جاندىكتەردىڭ دەرناسىلدەرى ەنگەن. ال ەڭ جەك كورەتىن تىرشىلىك يەلەرى دەپ تاسپاقۇرت، بال ارا قۇرتتارى مەن ءبيتتى ايتقان. زەرتتەۋگە قاتىسىپ، سۇراقتارعا جاۋاپ بەرگەندەر اراسىندا بالىق، مىسىق پەن ۇلۋلارعا قاتىستى ەشكىم جاعىمسىز پىكىر ايتپاعان. ال ءسىز قانداي تىرشىلىك يەسىنەن قورقاسىز؟
Massaget.kz
