قازاق جازۋشىلارى تۋرالى كوركەم فيلم جارىققا شىقتى
كوركەم فيلمنىڭ سەناريىن - سەرجان زاكەر ۇلى جازعان.
كارتينادا وتكەن عاسىردىڭ 70-80-جىلدارىندا ءومىر سۇرگەن قالامگەرلەردىڭ ءومىرى مەن شىعارماشىلىعى سۋرەتتەلەدى. سول زامانداعى ءدۇيىم جۇرتتىڭ بارىن باپتاپ، جوعىن جوقتاۋمەن جۇرگەن قارىمى مول قازاق جازۋشىلارىنىڭ باستان كەشكەن ناۋبەتتەرى، زامان مەن ادام اعىمىنداعى قاراما- قايشىلىقتار، بيلىك پەن بۇقارا اراسىنداعى بايلانىس وسى فيلمگە ارقاۋ بولعان.
«جازۋشىلار وداعىنىڭ بيىك مىنبەرىندە پارتيانىڭ جالىندى ۇندەۋلەرى جاريالانسا، جازۋشىلار ءۇيىنىڭ ىرگەسىندەگى «قالامگەر» ءدامحاناسىندا ايتىلاتىن اڭگىمەلەردىڭ اۋانى ءتىپتى باسقا بولاتىن. كومپارتيا نۇسقاۋلارىنىڭ كۇشى جۇرمەيتىن، سەنزۋرانىڭ قامىتى قىسپايتىن، جازۋشىلاردىڭ ويىن اشىق ايتىپ، ءازىلى مەن استارلى اڭگىمەسى، قالجىڭى مەن قاعىتپاسى قاتار جۇرەتىن «قالامگەر» ءدامحاناسى سول كەزدەگى قوعامنىڭ شىنايى بەت- پەردەسىنىڭ سيمۆولى رەتىندە الىنىپ وتىر. اتالمىش دراما ءبىر جاعى - قولىنا قالام ۇستاعان جازۋشى قاۋىمدى مەڭزەسە، استارلى ماعىناسىندا قالامگەر قاۋىمنىڭ تاۋەلسىزدىككە ۇمتىلعان بۇلقىنىسى، ىشىنە سىيماعان شەرلەرىن تارقاتاتىن ورىن - «قالامگەر» ءدامحاناسى جايىندا بولادى» ، - دەيدى كارتينانىڭ رەجيسسەرى مۇرات بيدوسوۆ.
وقيعا جەلىسى بويىنشا الاش ادەبيەتى تاقىرىبىندا ماقالا جازىپ كوزگە تۇسكەن ءساتجان ەسىمدى جاس جازۋشى بەلگىلى پروفەسسوردىڭ شاقىرۋىمەن الماتىعا كەلەدى. جازۋشىلار وداعىنا جۇمىسقا ورنالاسىپ، پروفەسسوردىڭ جەتەكشىلىگىمەن اتىن اتاۋعا تيىم سالىنعان الاش ادەبيەتىنىڭ اقتاڭداق بەتتەرىمەن تەرەڭدەي تانىسىپ، عىلىمي ديسەرتاتسياسىن جازۋعا كىرىسەدى. جازۋشىلار اراسىندا ورتالىق كوميتەتتىڭ كوزى مەن قۇلاعى بولىپ جۇرەتىندەر ءساتجاننىڭ ءار باسقان قادامىن اڭدىپ، ونىڭ ىسىنە بارىنشا توسقاۋىل قويادى.
جالپى فيلم ومىردە بولعان ادامداردىڭ پروتوتيپتەرى ارقىلى، ولاردىڭ باسىنان كەشكەن ناقتى وقيعالارىنا سۇيەنە وتىرىپ سول ءداۋىردىڭ تىنىس- تىرشىلىگىن كورسەتەدى.
«تۋىندى كەيىپكەرلەرىنىڭ كوپشىلىگى تاريحي تۇلعالار. 70 -جىلداردا ءومىر كەشكەن اقىن- جازۋشىلار. بۇل تاريحي وقيعالار مەن شىنايى ادامداردىڭ باسىنان كەشكەندەرى بولعانىمەن، كوركەم تۋىندىعا ءتان وقيعا جەلىسى دە قاتار ءوربيدى. تاريحي تۇلعالارمەن قاتار، كوركەم وبرازدار دا قوسىلعان. تۋىندىداعى باس كەيىپكەر ءساتجان ءوز داۋىرىندەگى قالامگەر قاۋىمىنىڭ جيىنتىق وبرازى بولسا، وعان قارسى تۇراتىن جاعىمسىز كەيىپكەر دە سول داۋىردەگى پارتيانىڭ سويىلىن سوققان، ۋاقىتتىڭ قۇربانى دەۋگەدە بولادى» - دەيدى «قالامگەر» فيلمىنىڭ سەناري اۆتورى سەرجان زاكەر ۇلى.
فيلمگە كورنەكتى جازۋشى دۋلات يسابەكوۆ جانە اقىن باقىت بەدەلحاندار كەڭەسشى رەتىندە تارتىلىپ، تۋىندىنىڭ جالپى مازمۇنى مەن كوركەمدىك تالاپتارى سول كىسىلەردىڭ سۇزگىسىنەن وتكەن.
كارتينادا باستى رولدەردى باعداۋلەت شايماحان، جالعاس تولعانباي، نارگيز التايباي، ەرگەنباي ابۋيەۆ، دوسجان جانبوتايەۆ، بالتاباي سەيىتمامىتوۆ، كەنەن اقۇرپەكوۆ، ايدار امانباي جانە ت. ب. اكتەرلار سومدايدى.
ايتا كەتەيىك، تۋىندى 12 - قىركۇيەكتەن باستاپ ەلىمىزدىڭ كينوتەاترلارىندا كورسەتىلەدى.
