ديپلوم ساتۋعا تيىم سالۋ ءبىلىم ساپاسىن ارتتىرۋعا ىقپال ەتەدى - قوعام قايراتكەرى
مۇنداي پىكىردى سەلينوگراد اۋدانىنىڭ قۇرمەتتى ازاماتى، قوعام قايراتكەرى سادىبەك تۇگەل ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ قازاقستان حالقىنا جولداۋىن تىڭداپ، وندا ۇستاز بەدەلىن ارتتىرۋعا ىقپال ەتەتىن تىڭ باستامالاردى ەستىپ، تاعى ءبىر مارقايىپ قالدىق. پرەزيدەنت از قامتىلعان جانە كوپبالالى وتباسىلاردى قولداۋ ءۇشىن ۇكىمەتكە دارىندى بالانىڭ قابىلەتىن دامىتۋدىڭ «جول كارتاسىن» ازىرلەۋى قاجەتتىگىن العا تارتتى.
سونىمەن قاتار ۇكىمەت پەن اكىمدەر دارىندى بالالاردىڭ ۇيىرمەلەر مەن ورتالىقتارعا، جازعى لاگەرلەرگە بارۋى ءۇشىن مۇمكىندىك جاساۋى كەرەكتىگىن ەسكەرتىپ ءوتتى. جولداۋدا جوعارى ءبىلىمنىڭ ساپاسى جايلى ءوزىمىزدىڭ تۇلەكتەردى جۇمىسپەن قامتۋ جاعىنان ەلىمىزدەگى جوعارى وقۋ ورىندارىنىڭ جارتىسى عانا 60 پايىزدىق دەڭگەيگە قول جەتكىزىپ وتىرعاندىعىنا توقتالا كەلىپ، ولاردىڭ سانىن قىسقارتۋ ماسەلەسىن قاراۋ كەرەكتىگىن جەتكىزدى.
اسىرەسە، تەرەڭ ءبىلىم بەرۋدىڭ ورنىنا ديپلوم ساتۋمەن اينالىسقان ۋنيۆەرسيتەتتەرىمىز بار ەكەنىن باسا ايتتى. بۇل تۇرعىدا وسىنداي وقۋ ورىندارىنا تىيىم سالۋ ارقىلى ءبىلىم بەرۋ ساپاسىن ارتتىرۋ قاجەتتىگىن ايتتى»، - دەدى ول ق ر پرەزيدەنتى قاسىم-جومارت توقايەۆتىڭ بيىلعى جولداۋىنا وراي پىكىر بىلدىرە كەلە.
سونىمەن قاتار، ول جولداۋدا ءبىلىم سالاسى جايلى وزەكتى ءبىر ماسەلە - قارجىلاندىرۋدىڭ بىركەلكى بولماۋى جانە ءبىلىم بولىمدەرىن باسقارۋ جانە بيۋدجەت قارجىسىن اكىمشىلەندىرۋ فۋنكتسيالارىن اۋداندىق دەڭگەيدەن وبلىستىق دەڭگەيگە بەرۋ، دەربەس قارجىلاندىرۋ ءتارتىبىن ەنگىزۋ، وقۋلىق ساپاسى مەن ۇستازدار جالاقىسىن ارتتىرۋعا نازار اۋدارىلۋى حالىقتىڭ كوڭىلىنەن شىققانىن ايتتى.
«بۇل جولداۋداعى ءبىلىم سالاسىنا قاتىستى ەڭ قاجەتتى ماسەلە - وقۋلىق ساپاسىنىڭ تومەندىگى تۋرالى بولدى. بۇل جونىندە مەملەكەت باسشىسى وقۋشىلاردى ساپالى وقۋلىقتارمەن قامتاماسىز ەتۋ - ءتيىستى مينيسترلىكتىڭ تىكەلەي مىندەتى ەكەندىگىن ايتتى. جولداۋداعى ۇستازدار قاۋىمىنا قاتىستى قۋانىشتى جاڭالىق مۇعالىمدەر مەن وقىتۋشىلاردىڭ الەۋمەتتىك جاعدايىن جاقسارتۋمەن بالانىستى بولدى. تامىز كونفەرەنتسياسىندا مەملەكەت باسشىسى الداعى ءتورت جىل ىشىندە مۇعالىمدەردىڭ ەڭبەك اقىسىن ەكى ەسە ارتتىرۋدى تاپسىرعان بولاتىن. الداعى جىلدان باستاپ ۇستازداردىڭ جالاقىسى 25 پايىزعا وسەتىنى ۇستازدار قاۋىمىن ءبىر سەرپىلتىپ تاستادى.
وسىلايشا، مەملەكەت باسشىسىنىڭ جولداۋى ءبىلىمنىڭ وزەكتى ماسەلەلەرىن قوزعاۋىمەن كوڭىلىمىزدەن شىقتى. بۇل جولعى جولداۋ وقىتۋدىڭ وزەكتى ماسەلەلەرىنىڭ شەشىلۋى مەن ۇستاز بەدەلىنىڭ ارتۋىنا ىقپال ەتەرىنە كامىل سەنەمىز»، - دەپ تۇيىندەدى سادىبەك تۇگەل.
اۆتور: اسلان وسپانوۆ
