جۇلدىز قوناقتارعا كيگىزەتىن شاپانداردىڭ باعاسى بەلگىلى بولدى
بۇل تۋرالى ول Tengrinews.kz تىلشىسىنە بەرگەن سۇحباتىندا ايتىپ بەردى. بۇرىنعى مينيستر ەلدە وتكىزىلەتىن بارلىق مادەني ءىس-شارا جاقسى ءوتۋى ءۇشىن (قازاقستان حاندىعىنىڭ 550 جىلدىعى، 2016 -جىلعى وليمپيادا ويىندارى، EXPO جانە تاعى باسقا) ءبىرىنشى كەزەكتە وزگە ەلدەردەن كەلەتىن قوناقتارمەن جاقسى قارىم-قاتىناس كەرەك دەيدى. سوندىقتان ولار ۇنەمى شەتەلدەن كەلگەن جۇلدىز قوناقتارعا شاپان كيگىزىپ وتىرعان ەكەن.
«شاپانداردىڭ باعاسى 300-400 مىڭ تەڭگە ارالىعىندا. ءبىراق بۇل باعا ولاردىڭ قازاقستانعا جاسايتىن جارناماسىمەن سالىستىرۋعا كەلمەيدى. نيكولاس كەيدجدى مازاق قىلىپ، ءتۇرلى مەمدەر پايدا بولعان كەزدە اشۋلاندىم. سوندىقتان مەن كەلەسى جولى پلاسيدو دومينگوعا قولداۋ كورسەتۋىن سۇراپ، بارلىعىن ءتۇسىندىردىم. ول ءبىز بەرگەن شاپاندى كيىپ، Instagram-عا جاريالاپ، «جەرگىلىكتى ءوڭىردىڭ داستۇرلەرىن ساقتاي وتىرىپ... قازاقستان - تاماشا ەل!» دەپ سۋرەتىنىڭ سيپاتتاماسىنا جازىپ قويدى»، - دەيدى ەكس-مينيستر.
بۇدان بولەك، مۇحامەدي ۇلى مينيستر قىزمەتىندە جۇزەگە اسىرعان جوبالارىن ايتىپ، تاعايىندالۋىنا قاتىستى پىكىر ءبىلدىردى.
ەستەرىڭىزگە سالا كەتەيىك، شاپان كيگەن قوناقتاردىڭ ىشىندە گولليۆۋد اكتەرى، پروديۋسەر جانە كينورەجيسسەر نيكولاس كەيدج بار، ول بيىل 22 -شىلدەدە استاناعا «ەۋرازيا» حالىقارالىق كينوفەستيۆالىنىڭ قوناعى رەتىندە كەلگەن بولاتىن. ونىڭ شاپانمەن تۇسكەن فوتوسۋرەتى الەۋمەتتىك جەلىلەردە تانىمال بولىپ، مەمگە اينالعان ەدى. ال كەيىن قازاقستاننىڭ اقپارات جانە كوممۋنيكاتسيالار ءمينيسترى داۋرەن ابايەۆ گولليۆۋد اكتەرى نيكولاس كەيدجدىڭ جەلىدە تانىمال بولعان سۋرەتىنەن كەيىن شاپاندى ۆەدومستۆاسىنىڭ ءاربىر قوناعىنا سىيلاۋعا ۋادە بەرگەن بولاتىن.
