قازاقستاندىق نوكاۋتشىلار اقتوبەدە تيتۋلدىق جەكپە-جەكتەرىن وتكىزەدى

بۇل تۋرالى ۆكونتاكتە الەۋمەتتىك جەلىسىندەگى «قازاقستاننىڭ كاسىپقوي بوكسشى» پاراقشاسىندا جازىلدى، دەپ حابارلايدى قازاقپارات.

29- قىركۇيەك كۇنى اقتوبەدەگى «جەكپە-جەك» سپورت سارايىندا كاسىپقوي بوكس كەشى وتەدى.

ونىڭ ۇيىمداستىرۋشىلارى - MTK Kazakhstan جانە Tukeshov Boxing Promotions پروموۋتەرلىك كومپانيالارى.

كەشتىڭ باستى ايقاستارىنا قازاقستاندىق ءالي بالويەۆ پەن ەدىل قوجامبەرديەۆ قاتىسادى.

اتاپ ايتقاندا، بىردە-ءبىر رەت جەڭىلىپ كورمەگەن ءا. بالويەۆ (9-0، 7 ك و) WBC- ءتىڭ اۋىر سالماقتاعى Asia Inter- Continental تيتۋلى ءۇشىن جۇدىرىقتاسادى. سونداي-اق جىعىلىپ كورمەگەن ە. قوجامبەرديەۆ (8-2، 8 ك و) WBA- ءدىڭ ءبىرىنشى اۋىر سالماقتاعى Asia East تيتۋلى ءۇشىن جەكپە-جەك وتكىزەدى.

بۇدان بولەك، اندەركارتتا قازاقستاندىق وزگە بوكسشىلارىمىز شىعاتىن بولادى: جەڭىل سالماقتا -  نۇرتاس اجبەنوۆ (6-0، 2 ك و)، قازاقستاننىڭ ەڭ جاس پروفي-بوكسشىسى، 17 جاستاعى داستان ءسادۋ ۇلى (3-0، 3 ك و) جانە ءبىرىنشى ورتا سالماقتاعى ءابىلقايىر شەعاليەۆ (6-0، 4 ك و). ولاردىڭ قارسىلاستارى كەيىنىرەك انىقتالادى.

ايتا كەتەيىك، MTK Kazakhstan الەمگە بەلگىلى MTK Global مەنەدجەرلىك كومپانياسىنىڭ -  رەسمي فيليالى. MTK Global تايسون فيۋري، بيللي دجو سوندەرس، ليام سميت جانە باسقا دا تانىمال بوكسشىلاردىڭ رينگتەگى ءىسىن جۇرگىزەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى