كوشپەندىلەردىڭ ەجەلگى وركەنيەتى تۋرالى فيلم شىقتى
كوشپەندىلەردىڭ ەجەلگى وركەنيەتىنە ارنالعان فيلمنىڭ رەجيسسەرى بولات ومار. فيلمدە اۆتورلار ءتاڭىر ءسوزىنىڭ تۇپكى ماعىناسىنا، شىعۋ تەگىنە ۇڭىلگەن. ءتۇسىرىلىم الماتى وبلىسىندا 5 جىل تۇسىرىلگەن.
«فيلم كوپتەگەن سۇراقتارعا جاۋاپ بەرەدى. مىسالى، نەلىكتەن قازاق جانە قىرعىز ويۋلارىنداعى ورنەكتەر مەن فونداردىڭ الاڭى بىردەي، كوشپەندىلەر مەن ەجەلگى گرەكتەردىڭ ويۋلارىن قانداي يدەيا بىرىكتىرەدى، نەلىكتەن ورتالىق ازيانىڭ كوشپەندىلەرى تۇرمىستا ەكى ءتۇستى ارقاندى پايدالانادى، نەلىكتەن ۆاتيكان كاردينالدارى موينىنا ەكى ءتۇستى ارقان ءجىپ بايلاپ جۇرەدى، ت. ب.»، - دەيدى بولات ومار.
ونىڭ ايتۋىنشا، ءتاڭىر ءسوزى تۇركىنىڭ «تاڭ» جانە ەجەلگى ەگيپەتتىڭ كۇن قۇدايىنىڭ اتى «را» سوزدەرىنەن قۇرالعان. «تاڭ - كۇنشىعىس، را - ەجەلگى ەگيپەتتىڭ كۇن قۇدايى. كەيبىرەۋلەر ءتاڭىر ءسوزى تاڭ جانە ەر سوزدەرىنەن قۇرالعان دەگەندى ايتادى»، - دەيدى اۆتورلار.
فيلم 7 بولىككە بولىنگەن، ونىڭ ءاربىرى 13 مينۋت جالعاسادى. كارتينا تاڭبالى تاستاعى بەس جارىم مىڭ جىل بۇرىن تاسقا قاشاپ سالىنعان سۋرەتتەردەن باستالىپ، ەجەلگى وركەنيەتتەر تۋرالى سىر شەرتەدى. اۆتورلاردىڭ ايتۋىنشا، تاڭىرشىلدىك - ءبىرقۇدايلىققا سىيىناتىن العاشقى الەمدىك ءدىن ءارى بۋدديزم، حريستيان جانە يسلام دىندەرى باستاۋىن سودان الادى.
