ەلوردادا «ۇلى دالا مۇراسى» جوباسىنىڭ تانىستىرىلىمى وتەدى
شارانىڭ ماقساتى - ۇلتتىق كودقا نەگىز بولاتىن ۇلتتىق قۇندىلىقتاردى، حالقىمىزدىڭ تاريحىن، مادەنيەتىن، سالت-ءداستۇرىن زاماناۋي فورماتتا تانىتىپ، مۇراجاي قىزمەتىن، ونداعى ەكسپوناتتار مەن جاۋھار جادىگەرلەردى كەڭىنەن ناسيحاتتاۋ.
مۇراجاي، مۋزەي - تاريحي-عىلىمي دەرەك رەتىندەگى ەسكەرتكىشتەردى، ونەر تۋىندىلارىن، مادەني قۇندىلىقتاردى، ت. ب. مۇرالاردى ساقتاپ، جيناقتاپ، عىلىمي-تانىمدىق قىزمەت اتقاراتىن مەكەمە.
مۇراجاي جيناقتالعان ەكسپوناتتاردى ساقتاپ قانا قويماي، زاتتىق جانە رۋحاني قۇندىلىقتاردى تانىتىپ، زەرتتەپ، مازمۇنىن ناسيحاتتاپ، وسى نەگىزدە ءتالىم-تاربيە بەرۋدە ماڭىزدى ءرول اتقارادى.
مۇراجاي عىلىمنىڭ، ءبىلىمنىڭ، مادەنيەتتىڭ قالىپتاسۋىنا ىقپال ەتەتىن عىلىمي مەكەمە رەتىندە وسكەلەڭ ۇرپاقتىڭ تاربيەسىنە، تاريحي سانانىڭ قالىپتاسۋىنا ىقپال ەتەدى. ۇلتتىق مۋزەيدە اتالعان باعىت بويىنشا ءتۇرلى جوبالار جۇزەگە اىسىرىلىپ كەلەدى. كوپشىلىك نازارىنا العاش رەت ۇسىنىلىپ وتىرعان «ۇلى دالا مۇراسى» جوباسى كوپشىلىكتى قوعامنىڭ مادەني سالاسىمەن بايلانىستىرىپ، مۇراجاي ءومىرىن تانىتۋدى كوزدەيدى.
جوبا ءار ايدىڭ ءۇشىنشى جەكسەنبىسىندە ءتۇرلى تاقىرىپتار بويىنشا ۇيىمداستىرىلادى. مۋزەيلىك كەشتىڭ العاشقى اشىلۋ سالتاناتىندا قوناقتارعا كونتسەرتتىك باعدارلاما، ارت پازل قۇراستىرۋ، قولونەر جۇمىستارى بويىنشا اشەكەيلەر جاساۋ، اعاش ويۋ، قىش ىدىستاردار جاساۋ شەبەرلىك ساباقتارى، «بەسىككە سالۋ» ءراسىمى، مۋزەي زالدارى بويىنشا شولۋ ەكسكۋرسيالار، «تاريح سىرى»، «مۋزەي بىلگىرى» ۆيكتورينالىق سۇراقتار، كىتاپ، كادەسىيلار جارمەڭكەسى ۇيىمداستىرىلىپ، «توعىزقۇمالاق»، «اسىق اتۋ»، ت. ب. قازاقتىڭ ۇلتتىق ويىندارى ويناتىلادى.
ايتا كەتكەن ءجون، قازاقستان رەسپۋبليكاسىنىڭ ۇلتتىق مۋزەيى - ورتالىق ازياداعى ەڭ ۇلكەنى. مۇراجاي قازاقستان رەسپۋبليكاسىنىڭ تۇڭعىش پرەزيدەنتى ن. نازاربايەۆتىڭ تاپسىرماسىمەن «مادەني مۇرا» مەملەكەتتىك باعدارلاماسى اياسىندا قۇرىلعان.
