وسكەمەندە ۇلكەن تەننيستەن حالىقارالىق دودا باستالدى
ITF باعدارلاماسىنا ەنەتىن ايتۋلى دودا شىعىس جەرىندە تۇڭعىش رەت جالاۋىن جەلبىرەتىپ وتىر، دەپ حابارلايدى قازاقپارات التاينيۋس سايتىنا سىلتەمە جاساپ.
ءبىر اپتاعا سوزىلاتىن جارىستا قازاقستاننىڭ، سونىمەن قاتار ا ق ش، بەلارۋس، يزرايل، ليتۆا، وزبەكستان، پولشا، رەسەي، سەربيا، شۆەتسيا سياقتى 10 عا جۋىق ەلدىڭ كاسىپقوي تەننيسشىلەرى باق سىنايتىن بولادى. ارالارىندا تەننيس سۇيەر قاۋىمعا ەسىمدەرى جاقسى تانىس راكەتكالار دا بار. ماسەلەن، تاجىريبەلى رەسەيلىك تەننيسشى كونستانتين كراۆچۋك «چەللەندجەر» سەرياسى اياسىنداعى ءۇش تۋرنيردە توپ جارىپ، كەزىندە الەمنىڭ ۇزدىك 100 ويىنشىسى قاتارىنا ەنگەندى. سول سياقتى يزرايلدىك ەدان لەشەم مەن رەسەيلىك بوگدان بوبروۆ تا ءبىرشاما جەتىستىككە جەتىپ ۇلگەرگەن راكەتكالار سانالادى. وسكەمەندەگى تۋرنيردە ءدال وسىنداي ساقا سپورتشىلارعا ءبىزدىڭ ەلدىڭ تەننيسشىلەرى دە قارسىلاس اتانباق.
بەلگىلى بولعانداي، تۋرنير الدىندا جارىس كەزدەسۋلەرى وتەتىن «Smash» تەننيس ورتالىعىندا كۇردەلى جوندەۋ جۇمىستارى جۇرگىزىلدى. اتاپ ايتقاندا، مۇنداعى كورتتاردىڭ جابىندىسى جاڭالانعان.
وسكەمەندەگى تەننيس كورتتارىنىڭ ساپاسىنا شەتەلدىك سپورتشىلار دا جوعارى باعا بەرۋدە. سولادىڭ ءبىرى - شۆەتسيالىق نيكلاس يوحانسسون.
«شىنى كەرەك، بۇعان دەيىن وسكەمەن قالاسى جايىندا ەستىپ كورمەپپىن. بۇگىن الىستاعى قازاقستاننىڭ ءبىر تۇكپىرىندە دە وسىنداي كەرەمەت تەننيس ورتالىعى، زاماناۋي كورتتار بار ەكەنىن كورىپ، تاڭدانىسىمدى جاسىرا الماي وتىرمىن. مۇنداي جەردە ويناۋدىڭ ءوزى ءبىر عانيبەت» ، - دەيدى شەتەلدىك تەننيسشى.
جارىستارعا كىرىپ، تاماشالاۋ - تەگىن. تەننيس دوداسى 31 - تامىزعا دەيىن جالعاسادى.
