شيەلىدە سيىردىڭ سۇتىنەن قىمىز وندىرە باستادى
دەپ حابارلايدى «حابار 24».
تەحنولوگ - بايان دۇيسەنبەكتىڭ قولىنان كۇن سايىن پروبيركالارى تۇسپەيدى. ول ارنايى سەح لابوراتورياسىندا ءسۇت قۇرامىن زەرتتەيدى، قۇنارلى جاڭا ءونىم تۇرلەرىن شىعارۋ باعىتىندا ىزدەنەدى. بۇعان دەيىن ۇزاق ساقتالاتىن اشىتقى، شۇباتتان بالمۇزداق شىعارعان بايان ەندى سيىر سۇتىنەن قىمىز وندىرۋگە بىلەك سىبانىپ كىرىسىپ وتىر.
بايان دۇيسەنبەك، تەحنولوگ:
- سيىر سۇتىنەن بولىنەتىن سارىسۋدى پايدالانا وتىرىپ، قىمىز وڭدەپ شىعارىپ جاتىرمىز. جىلقىنىڭ سۇتىمەن وتە قاتتى دارەجەدە ايىرماشىلىعى جوق. نەگىزگى پايداسى وتە زور. ىشكى اعزا، اسقازان قۇرىلىسىنا، ودان بولەك سيىر سۇتىنەن بولىنەتىن سارىسۋدىڭ ادام اعزاسىنا بەرەرى وتە مول.
سەحتا كۇنىنە 3 تونناداي سيىر ءسۇتى وڭدەلەدى. ودان 1 تونناعا جۋىق سارىسۋ ءبولىنىپ، قالدىق رەتىندە پايداعا اسپاي قالادى ەكەن. ال بايان دۇيسەنبەكتىڭ قۇنارلى سۋسىنى سول قالدىقتان جاسالادى. دەمەك، تاعى ءبىر پايداسى - قالدىقسىز ءوندىرىس قۇرۋعا مۇمكىندىك تۋىپ تۇر.
بايان دۇيسەنبەك، تەحنولوگ:
- الماتى قالاسىندا ۇلتتىق بيوتەحنولوگيالىق ورتالىق بار، بۇل جۇمىس سولارمەن بىرلەسە وتىرىپ، اگرارلىق ۋنيۆەرسيتەتپەن بىرلەسە وتىرىپ جاسالىپ جاتىر. ءالى دە تەكسەرىلۋ ۇستىندە، تولىققاندى تەكسەرىلىپ بولعاسىن ءبىز ونى ارنايى ساتىلىمعا جىبەرەمىز.
شاعىن سەحتاعى ۇلكەن جاڭالىقتار بولاشاق ءىرى بيزنەس جوبالارعا دا نەگىز بولعان.
سابىر ەرماحانوۆ، كاسىپكەر:
- 2016 -جىلى بىزدە اۋىل شارۋاشىلىعى كووپەراتيۆى ۇيىمداستىرىلىپ، باستاپقى كەزدە 10 مۇشە بولدى، قازىرگى كەزدە 35 مۇشەمىز بار. 80 ادام جۇمىس ىستەپ جاتىر، 750 تۇيە باعىپ جاتىرمىز، 285 سيىر، 150 -جىلقى بار. تازا ءونىم بولعاندىقتان سۇرانىس كوبەيىپ جاتىر، سوندىقتان دا ءبىز جىلدان جىلعا مالدىڭ سانىن كوبەيتىپ، ءونىمدى دە ۇلعايتىپ جاتىرمىز.
ازىرگە بۇل سەح جەرگىلىكتى تۇرعىنداردى شۇبات، ايران، قۇرت، ىرىمشىك سەكىلدى 10 ءتۇرلى ءسۇت ونىمىمەن قامتاماسىز ەتىپ وتىر.
