تاشكەنتتە «استانا بالەت» ۇمىتىلماس كونسەرت وتكىزىپ، وزبەك حالقىنىڭ العىسىن ارقالاپ قايتتى
ايگىلى بالەت اريف مەليكوۆتىڭ «ماحاببات جايلى اڭىزى» تاشكەنت حالقىن ەرەكشە تامساندىرىپ، تەاتر ۇجىمى زالعا لىق تولعان حالىقتىڭ العىسىن ارقالاپ كەلدى، دەپ حابارلايدى قازاقپارات ءتىلشىسى.
«استانا بالەت» تەاترى ەۋروپالىق، كەرەك دەسەڭىز الەمدىك دەڭگەيگە ءوتىپ كەتكەن. بۇگىن ءبىز ناعىز بالەت قويىلىمىن تاماشالادىق. ءبىرىنشى كەزەكتە مەنى كوردەبالەت تاڭ قالدىردى. وندا بارلىعى دا - ءوسىم مەن ەنەرگەتيكا كەرەمەت ۇيلەسكەن. مەن مايا پليسەتسكايا بيلەگەن مەحمەنە مونانى ەسكە الامىن. سىزدەردىڭ ارتىستەرىڭىز وتە جوعارى دەڭگەيدە ونەر كورسەتەدى دەپ ەسەپتەيمىن» ، - دەدى مۋزىكاتانۋشى، وزبەكستاننىڭ ەڭبەك سىڭىرگەن مادەنيەت قىزمەتكەرى يننەسسا گۇلزاروۆا.
«ماحاببات تۋرالى اڭىز» - ايگىلى حورەوگراف يۋري گريگوروۆيچتىڭ العاشقى سپەكتاكلدەرىنىڭ ءبىرى. بۇل قويىلىمدا بالەت ونەرىن بۇرىن- سوڭدى بولماعان بيىكتىككە كوتەرگەن ءتورت ءمىنسىز كومپونەنت بار. ليبرەتتو نەگىزىندە دراماتۋرگ نازىم حيكمەتتىڭ فيلوسوفيالىق پەساسى جاتىر. ال، ەرەك ستسەنوگرافيانى سيمون ۆيرسالادزە جازىپ شىققان.
ال تاشكەنت مەملەكەتتىك جوعارى ۇلتتىق بي مەن حورەوگرافيا مەكتەبىنىڭ رەكتورى شۋحرات تۋحتاسيموۆتىڭ ايتۋىنشا، كەز كەلگەن بالەتتىك ترۋپپا مۇنداي سپەكتاكلدى باعىندىرا بەرمەيتىنىن ايتادى.
«بۇگىن «استانا بالەت» تەاترىندا ونەر كورسەتەتىن ارتىستەردىڭ كەرەمەت قادامىن كورىپ وتىرمىز. ترۋپپا 100 پايىز حورەوگرافيامەن اينالىسادى. ويتكەنى ول قازاقستاننان كەلەدى، سپەكتاكلدىڭ شىعىسقا ءتان بوياۋىن بەرە الادى» ، - دەيدى ول.
سيۋجەت كونە شىعىس اڭىزىنان الىنعان. اپالى- ءسىڭلىلى مەحمەنە بانۋ مەن شىرىن فەرحاد اتتى ءبىر سۋرەتشىگە عاشىق بولىپ قالادى. شىرىن ادەمى جىگىتتىڭ جۇرەگىن بىردەن جاۋلاپ الادى دا، مەحمەنە بانۋ سەزىم سەرگەلدەڭىنە تۇسەدى: سەبەبى، ءبىر كەزدەرى ول اپكەسىنىڭ ءومىرىن قۇتقارۋ ءۇشىن ءوزىنىڭ سۇلۋلىعىن قۇربان ەتكەن- ءتىن. عاشىقتار سارايىنان قاشىپ كەتكەندەردى اۋىر سىناق كۇتىپ تۇر ەدى. الايدا فەرحاد حالىقتى قۇتقارۋ ءۇشىن ءوزىنىڭ ماحابباتىن قۇربان ەتەدى.
يۋري گريگوروۆيچتىڭ حورەوگرافياسىندا ويدىڭ كەرەمەت كۇشى، بوياۋلاردىڭ كوپ قاباتتىلىعىمەن ۇشتاسقان ءتىلدىڭ ءبىر ماعىنالى ايشىعى بار. سپەكتاكل كورەرمەندى ءبىر دەمدە وزىنە تارتىپ الىپ، كوپشىلىك ارتىستەردىڭ ءار قيمىلىنا كوڭىل ءبولىپ وتىردى.
«استانا بالەت» تاماشا اسەر قالدىردى. بارلىق درامالىق جەلى كەرەمەت اشىلعان. سوليستەرگە توزىمدىلىگى ءۇشىن ەرەكشە راحمەت ايتىپ قويالىق، ويتكەنى گريگوروۆيچتىڭ حورەوگرافياسى ەرەكشە اۋىر. فارحاد وتە باتىل. مەنىڭ ويىمشا، بارلىق ايەلدىڭ جۇرەگىن جاۋلاعان سەكىلدى. ءبىز كەلگەنىمىزگە وتە قۋانىشتىمىز، ارتىستەرىڭىز كەرەمەت شابىتتاندىردى» ، - دەدى الىشەر ناۋاي اتىنداعى وزبەكستاننىڭ ۇلكەن تەاترى جەتەكشى ءسوليستى ناديرا حامرايەۆا.
