شەتەلدىك اسكەري اكادەميالارعا وقۋعا قالاي تۇسۋگە بولادى؟
بۇل تۋرالى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى.
قازاقستاندىق ارميانىڭ 300 وفيتسەرى ىرىكتەۋدەن وتەدى. قابىلداۋ كوميسسياسى كاسىبي ءبىلىمىن، مورالدىق- پسيحولوگيالىق جانە دەنە دايارلىعىن باعالايدى. ءار كەزەڭدى قورىتىندىلايدى. مىسالى، ەگەر ۇمىتكەر ءبىر كەزەڭدە شەكتى دەڭگەيگە جەتپەسە، وندا ول كەلەسى كەزەڭگە جىبەرىلمەيدى.
قابىلداۋ كوميسسياسى ءتۇسىندىرىپ وتكەندەي، ۇمىتكەرلەردىڭ اسكەري قىزمەت وتكەرۋى نازارعا الىنادى، وفيتسەردىڭ جاۋىنگەرلىك دايىندىقتاعى جەتىستىكتەرى، سىنىپتىق بىلىكتىلىك دەڭگەيى ماڭىزدى. ىرىكتەۋ قورىتىندىسىمەن ۇزدىك ناتيجە كورسەتكەن اسكەري قىزمەتشى تاڭدالىپ، ول قازاقستاننىڭ ۇلتتىق قورعانىس ۋنيۆەرسيتەتىندە، سونداي-اق شەتەلدىڭ اسكەري اكادەميالارىندا وقيتىن بولادى.
«بيىل قازاقستان قارۋلى كۇشتەرىنەن 53 وفيتسەر ا ق ش- تا، تۇركيادا، ۇلى بريتانيادا، رەسەيدە، گەرمانيادا وقىپ، اسكەري اكادەميالاردى، كوللەدجدەردى جانە وقۋ-جاتتىعۋ ورتالىقتارىن بىتىرگەنىن اتاپ وتكەن ءجون. نەگىزگى ماماندىقتار اسكەر تۇرلەرى مەن تەكتەرىن، اسكەري بولىمدەر مەن قۇرامالاردى باسقارۋعا قاتىستى ارميالىق، مايداندىق، اسكەري-كولىكتىك اۆياتسيا، بايلانىس اسكەرلەرى، ءاشقق، ماتەريالدىق-تەحنيكالىق جانە تىلدىق قامتاماسىز ەتۋ، سونداي-اق مەملەكەتتىك ساياسات، باسقارۋ جانە حالىقارالىق قاتىناستار ماماندىقتارى»، - دەلىنگەن حابارلامادا.
