«وتانداستار قورىنىڭ» رەسمي پورتالى ىسكە قوسىلدى
«بۇگىندە oq.gov.kz سىلتەمەسىندە قوردىڭ رەسمي ۆەب-پورتالى ىسكە قوسىلدى. پورتال ارقىلى سىزدەر قولعا العان جوبالارىمىز، اتقارعان جانە اتقاراتىن ىستەرىمىز، وتكىزگەن جانە وتكىزەتىن شارالارىمىز، ورالماندارعا قاجەتتى زاڭدىق اقپاراتتار، ءبىز كورسەتەتىن قىزمەتتەر جايلى، جالپى ورالماندار، شەتتەگى قانداستار، وتانداستارعا قاجەتتى مالىمەتتەرمەن تانىسا الاسىزدار. قوعام تالقىسىنا شىعارىلاتىن قوعامدىق مونيتورينگ پەن دياسپورالدى ساياسات ماسەلەسىن، قور جۇمىسىنىڭ قوعامدىق تىڭدالىمىن تالدايتىن قوعامدىق كوميسسيا جۇمىسى تۋرالى اقپاراتتى دا وسى جەردەن تاباسىز»، - دەپ جازادى «وتانداستار» قورىنىڭ ءبىرىنشى ۆيتسە- پرەزيدەنت تالعات ادۋوۆ ءوزىنىڭ facebook پاراقشاسىندا.
قازىر پورتالدا ورالماندارعا كورسەتىلگەن كومەك جايىندا ستاتيستيكالىق مالىمەت بار. بولاشاقتا ونىڭ سانى ارتپاق.
«ءبىز پورتالعا قوردىڭ وڭىرلىك فيليال باسشىلارىنىڭ جەكە كابينەتىن ەنگىزەمىز. وتانداستار سول جەرگە ەلەكتروندى تىركەلۋ نەمەسە komek@oq.qov.kz ارقىلى باسشىلىققا ءوز سۇراعىن قويا الادى. ماسەلەنىڭ شەشىلۋ بارىسىن پورتالدان سۇراق قويۋشىمەن قاتار ورتالىقتاعى باسشىلىق تا باقىلاي الادى»، - دەيدى ت. ادۋوۆ.
اقپارات ازىرگە تەحنيكالىق رەجيمدە تولتىرىلىپ جاتقان، زاماناۋي تالاپقا ساي جان جاقتى جاساقتالعان پورتال - قىزىقتى دا قاجەتتى اقپاراتتارى، سەرۆيستەرى، بولىمدەرى مەن بولىمشەلەرى بار بايلانىس الاڭى بولماق.
ايتا كەتسەك، «وتانداستار» قورى ەلباسى ن. نازاربايەۆتىڭ دۇنيەجۇزى قازاقتارىنىڭ V قۇرىلتايىندا شەتەلدەگى قازاقتاردى قولداۋ بويىنشا بەرگەن تاپسىرمالارى جانە قر ۇكىمەتىنىڭ 2017-جىل 13- قازانداعى «وتانداستار قورى كوممەرتسيالىق ەمەس اكتسيونەرلىك قوعام قۇرۋ تۋرالى» 644№ قاۋلىسى نەگىزىندە قۇرىلعان.
قور ماقساتى ورالماندارعا، شەت ەلدە تۇراتىن ەتنيكالىق قازاقتارعا، سونىمەن قاتار شەت ەلدەرگە تۇراقتى قونىس اۋدارعان وتانداستارعا جان جاقتى قولداۋ كورسەتۋ. بۇگىندە قور وسى ماقساتتى جۇزەگە اسىرۋ ءۇشىن دياسپورالدى ساياسات، ديالوگ الاڭى، بەيىمدەلۋگە كومەك، ءبىلىم سالاسىندا عالامدىق باسەكەلەستىككە بەيىمدەلگەن مامانداردى دايىنداۋ، قازاق مادەنيەتىن ىلگەرىلەتۋ، بيزنەس پەن يننوۆاتسيانى دامىتۋ، قازاقتاردىڭ ءبىرتۇتاس اقپاراتتىق ينتەرنەت قوعامداستىعىن قۇرۋ، شەتەلدىك سەرىكتەستەر جانە جەرگىلىكتى اتقارۋشى ورگاندارمەن جۇمىس، قازاقتاردىڭ دۇنيەجۇزىلىك قاۋىمداستىعى جۇمىسىن جانداندىرۋ ءتارىزدى توعىز باعىتتا جۇمىس ىستەۋدە.
