قازاقستان «تانك بياتلونىنىڭ» جارتىلاي فينالىندا قىتايدى ارتتا قالدىردى
بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
ەستافەتانى بىرىنەن سوڭ ءبىرى ءۇش ەكيپاج ءوتتى. ولاردىڭ ءارقايسىسى كەدەرگىلەردى ەڭسەردى، نىسانالاردى جويا وتىرىپ، 4 اينالىمنان جاسادى.
«اۋا رايىنىڭ ناشارلىعىنا قاراماستان، ءاربىرىمىز بارىنشا كۇش-جىگەرىمىزدى سالدىق. جانە جاقسى ناتيجە كورسەتە الدىق»، - دەدى اعا لەيتەنانت، ەكىنشى ەكيپاجدىڭ كومانديرى فەرۋز تۋلابايەۆ.
«ەستافەتا» كونكۋرسىنىڭ جارتىلاي فينالدىق كەزەڭى تابيعي جانە جاساندى كەدەرگىلەردەن، جاۋىنگەرلىك جولاقتاردان، اتۋعا ارنالعان الاڭدار مەن ۋچاسكەلەردەن، ايىپ ۋاقىتىنا ارنالعان الاڭنان تۇرادى. وندا ءبىر كوماندادان ءۇش تانك ەكيپاجى ءبىر تەحنيكامەن ونەر كورسەتەدى. ءاربىر ەكيپاج ءتورت اينالىم جاساپ، جولىنداعى كەدەرگىلەردەن وتەدى، نىسانانى جويادى. ەستافەتا بارىسىندا تانكىلىك پۋشكادان وق اتۋ ءجۇرىس بارىسىندا ورىندالادى. قوسارلانعان جانە زەنيتتىك پۋلەمەتتەن - اتۋعا ارنالعان الاڭنان توقتاپ تۇرعان كۇيىندە اتىلادى.
