ۇستالعان اتامبايەۆتىڭ ۇلى مەن جاقتاستارى تەرگەلدى
بۇل تۋرالى ازاتتىقتىڭ قىرعىز قىزمەتىنە زامير جووشيەۆ حابارلادى.
ادۆوكاتتىڭ سوزىنشە، كۋاگەر رەتىندە تەرگەۋگە بۇرىنعى پرەزيدەنتتىڭ ۇلى سەيتەك اتامبايەۆ تا شاقىرىلعان. جووشيەۆ كوي-تاشتاعى وقيعا كەزىندە اتامبايەۆ ۇلىنىڭ «اياعى سىنىپ، قولى جارالانعانىن» ايتادى.
بۇعان دەيىن الەۋمەتتىك جەلىلەردە سەيتەك اتامبايەۆتىڭ ۇستالىپ، تەرگەۋگە جەتكىزىلگەنى تۋرالى ۆيدەو تاراعان. كەيىننەن قىرعىزستان ىشكى ىستەر مينيسترلىگى اتامبايەۆ ۇلىنىڭ كۋاگەر رەتىندە شاقىرىلعانىن، قۇقىق قورعاۋ ورگاندارى ونى ۇستاماعانىن حابارلادى.
بۇعان دەيىن جوگوركۋ كەنەش (قىرعىزستان پارلامەنتى) دەپۋتاتتارى اسەل كودۋرانوۆا مەن يرينا كارامۋشكينانىڭ، كوي-تاشتاعى وپەراتسيا كەزىندە اتامبايەۆتى قولداعان وپپوزيتسيالىق ساياساتكەر راۆشان جەەنبەكوۆتىڭ تەرگەۋگە شاقىرىلعانى حابارلانعان. ق س د پ- نىڭ رەسمي وكىلى كۋندۋز جولدۋبايەۆا ازاتتىقتىڭ قىرعىز قىزمەتىنە «ەكى دەپۋتاتتىڭ بىرنەشە ساعات تەرگەۋدەن سوڭ بوساپ شىققانىن، اتامبايەۆتىڭ باسقا جاقتاستارى تەرگەۋگە شاقىرىلىپ جاتقانىن» ايتتى.
7- تامىزدا باستالعان اتامبايەۆتى ۇستاۋ وپەراتسياسى ارنايى جاساق پەن ەكس-پرەزيدەنت جاقتاستارىنىڭ قاقتىعىسىنا ۇلاسىپ، ءبىر اسكەري قازا تاپقان. ونداعان ادام جاراقاتتاندى. ارنايى جاساقتىڭ التى ساربازىن بۇرىنعى پرەزيدەنتتىڭ جاقتاستارى كەپىلگە الىپ، ەرتەڭىنە بوساتقان. اتامبايەۆ 8- تامىزدا جالعاسقان وپەراتسيا كەزىندە ءوز ەركىمەن بيلىككە بەرىلدى. وعان جەمقورلىق ايىبى تاعىلىپ، ەكس-پرەزيدەنت 26- تامىزعا دەيىن قاماۋعا الىندى. قازىر ونىڭ ءىسى تەرگەلىپ جاتىر.
27- ماۋسىمدا قىرعىزستان پارلامەنتى المازبەك اتامبايەۆتى ەكس-پرەزيدەنت جانە تيىسپەۋشىلىك مارتەبەسىنەن ايىرعان. كەيىن ءى ءى م اتامبايەۆتى تەرگەۋگە شاقىرا باستادى. ءۇش رەت شاقىرتۋ جىبەرگەنىمەن تەرگەۋگە بارماعان اتامبايەۆتى مينيسترلىك ارنايى وپەراتسيا جۇرگىزىپ، كۇشتەپ اكەلۋدى تاپسىرعان.
قىرعىزستاننىڭ بۇرىنعى پرەزيدەنتىنە قىزمەتتە ءجۇرىپ جەمقورلىققا جول بەردى، وكىلەتىن اسىرا پايدالاندى جانە زاڭسىز بايىدى دەگەن سياقتى جالپى سانى بەس ايىپ تاعىلعان. پروكۋراتۋرا اتامبايەۆ قىلمىستىق توپتار اراسىندا تانىمال ازيز باتۋكايەۆتىڭ زاڭسىز بوساتىلۋىمەن بايلانىستى ىستە كۋاگەر رەتىندە تانىلعانىن مالىمدەگەن.
اتامبايەۆ بۇل ايىپتاردىڭ ءبارىن جوققا شىعارىپ، ءوزىن تەرگەۋگە شاقىرۋدىڭ ساياسي استارى بار دەپ مالىمدەگەن. ول ازيز باتۋكايەۆتى بوساتۋعا قاتىسى جوعىن دا ايتقان. اتامبايەۆ قىرعىزستاندى 2011-2017-جىلدارى باسقارعان. ونىڭ ورنىنا بيلىككە 2017-جىلدىڭ سوڭىندا سايلاۋ جولىمەن سوورونباي جەەنبەكوۆ كەلگەن.
