ەلوردا اكىمدىگى ماسانىڭ قاپتاپ كەتۋ سەبەبىن اتادى
«بىزدە ماۋسىم ايىنىڭ 13 كۇنى جاۋىن- شاشىندى بولدى. سوعان وراي ىلعالدىلىق دەڭگەيى ارتتى. ال بۇل ماسا ءۇشىن وتە قولايلى ورتا قالىپتاستىرادى. جاۋىن- شاشىنسىز ۋاقىتتىڭ ارالىعى نەبارى 2-3 كۇندى قۇرادى. وسى ەكى- ءۇش كۇننىڭ ىشىندە ۋلاۋ جۇمىستارى جۇرگىزىلدى. دەگەنمەن، سىزدەر بىلۋلەرىڭىز ءۇشىن ايتا كەتەيىن، جاۋىندى كۇندەرى ماساعا قارسى ۋلاۋ جۇمىستارى جۇرگىزىلمەيدى. سەبەبى جاڭبىر سۋى شاشقان ءدارىنى شايىپ كەتىپ، ونىڭ ەشقانداي اسەرى بولمايدى» ، - دەدى نۇر- سۇلتان قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ديرەكتورى ءسادۋاقاس بايعابىلوۆ.
وسى رەتتە، ول شىلدە ايىندا ەلوردا جۇرتشىلىعىنىڭ مازاسىن العان ماسانىڭ نەلىكتەن قاپتاپ كەتكەنىن ءتۇسىندىردى.
«شىلدەدەگى ماسانىڭ قاپتاپ كەتۋ سەبەبىنە توقتالسام، ايدىڭ 2-4 كۇندەرىندە مول جاۋىن- شاشىن ءتۇستى. سوعان بايلانىستى ماساعا قارسى وڭدەۋ جۇمىستارى توقتاتىلدى. دەمالىس كۇندەرى اۋا رايى تۇراقتالىپ، كۇن ىسىدى، ۋلاۋ جۇمىستار قايتا جانداندى. وسى جانە كەلەسى اپتا ىستىق بولماق. دەمالىس كۇندەرىنەن بەرى قالانىڭ ساياباقتارى، گۇلزارلار، ەسىلدىڭ جاعالاۋى، سونىمەن قاتار 141 شاعىن سۋ قويمالارىندا ماسانى ۋلاۋ جۇمىستارى جۇرگىزىلىپ جاتىر» ، - دەدى ءسادۋاقاس بايعابىلوۆ. ونىڭ اتاپ وتۋىنشە، ەلوردانىڭ 4 اۋدان اكىمدىگى ماسانىڭ دەرناسىلى تۇسەتىن ءساۋىر ايىنان باستاپ قىركۇيەككە دەيىن ۋلاۋ جۇمىستارىن جۇرگىزەدى. ماسانى ۋلاۋعا قاجەتتى ءدارىنىڭ ءتىپتى كەلەسى جىلعا جەتەرلىك قورى بار. ەسكە سالساق، بۇعان دەيىن ەلوردا اكىمى التاي كولگىنوۆ ماسا ۋلاۋدى ۋاقىتىندا قولعا الماعاندار جازالاناتىنىن ايتقان ەدى.
