قورعانىس ءمينيسترى ارىس قالاسىنا كەلدى
جۇمىس ساپارى كەزىندە گەنەرال-مايور نۇرلان ەرمەكبايەۆ قالا ماڭىن اينالا ۇشىپ، ارسەنال مەن توڭىرەكتەگى اۋماقتى تۇگەل شولىپ شىقتى، سونداي-اق وق-ءدارى بولشەكتەرىن جويۋ جۇمىسىمەن تانىستى.
وقيعا ورنىندا وسى جۇمىستى اتقارىپ جۇرگەن ينجەنەرلىك-ساپەرلىك، ماتەريالدى-تەحنيكالىق بولىمشەلەردىڭ جەكە قۇرامى مەن اسكەري ءورت سوندىرۋشىلەرگە قاۋىپسىزدىك شارالارىن ساقتاۋ جونىندە نۇسقاۋ بەرىلدى. قورعانىس ۆەدومستۆوسىنىڭ باسشىسى ءبىرقاتار ناقتى تاپسىرما جۇكتەدى. ءبىرىنشى كەزەكتە ازاماتتىق تۇلعالاردىڭ قاۋىپسىزدىگىن ساقتاۋ، ەكىنشىدەن، وق- ءدارىنى ىزدەۋ جانە جويۋ جۇمىسىمەن اينالىسىپ جاتقان اسكەري قىزمەتكەرلەردىڭ قاۋىپسىزدىگى اسا ماڭىزدى.
سونداي-اق، مينيستر اۋا رايىنىڭ قولايسىزدىعىنا قاراماستان كۇندىز-ءتۇنى تىنباي ەڭبەكتەنىپ جۇرگەن قر قارۋلى كۇشتەرى بولىمشەلەرىنىڭ جەكە قۇرامىمەن كەزدەستى. جوعارى باس قولباسشى اتاپ وتكەندەي، توتەنشە جاعداي سالدارىن جويۋعا اتسالىسقان اسكەريلەردىڭ ەڭبەگى جاۋىنگەرلىك تاپسىرمانى ورىنداۋمەن تەڭ.
ارىس قالاسىنا نۇرلان ەرمەكبايەۆپەن بىرگە قورعانىس مينيسترلىگىنىڭ باس ينسپەكسياسى دا كەلدى. ولار توتەنشە جاعدايدىڭ سەبەبىن انىقتاۋ ءۇشىن ىشكى قىزمەتتىك تەكسەرىس جۇرگىزەدى.
ەسكە سالا كەتەيىك، بۇعان دەيىن ايماقتا ءبۇتىن وق-ءدارىنى الىپ كەتۋ جانە وق-ءدارى بولشەكتەرىن جويۋ جۇمىستارى ءجۇرىپ جاتقانى حابارلانعان بولاتىن. بۇل جۇمىستار قالا تۇرعىندارىنا قاۋىپ تۋعىزبايدى.
