ق ر پرەزيدەنتى: مەكتەپتە دومبىرا ۇيرەنۋ ساباعىن ەنگىزۋ قاجەت
بۇل تۋرالى بۇگىن ۇلتتىق دومبىرا كۇنىنە ارنالعان مەرەكەلىك كونسەرتتە قازاقستان پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«بۇگىن مىنە بارشا حالىق بولىپ، ۇلتتىق اسپاپتان شىققان كۇيدىڭ قۇدىرەتىن، قۋاتىن سەزىندىك. «سارىارقا»، «بالبىراۋىن»، «اداي»، «ءالقيسا» كۇيلەرى ۇلتتىق رۋحىمىزدى كوتەرەتىن تاڭعاجايىپ تۋىندىلار. دومبىرانىڭ پەرنەسىنەن شىققان كۇيدە حالقىمىزدىڭ تەرەڭ تاريحى بار. ءبىز اتادان بالاعا امانات بولعان اسىل مۇرامىزدى ساقتاپ، قادىر تۇتۋىمىز قاجەت. قۇرمانعازى، داۋلەتكەرەي، تاتتىمبەت، دينا، نۇرعيسالار باستاعان كۇيشىلىك ءداستۇردى ەلىمىزدىڭ دارىندى جاستارى جالعاستىرىپ كەلەدى»، دەدى قاسىم-جومارت توقايەۆ.
قازاقستان پرەزيدەنتى ۇلتتىق دومبىرا مەرەكەسى جاس ۇرپاقتىڭ ءداستۇرلى ونەرگە دەگەن قۇرمەتىن ارتتىراتىندىعىن ايرىقشا اتاپ ءوتتى.
«بۇل رۋحاني جاڭعىرۋ جولىنىڭ نەگىزگى ارقاۋى. بۇگىندە ۇلتتىق اسپابىمىز كۇللى الەم مويىنداعان مادەني قۇندىلىققا اينالدى. بۇل قازاقتىڭ قاسيەتتى قارا دومبىراسىنا بەرىلگەن ءادىل باعا. «ونەر ۇلت كەلبەتى» دەيدى دانا حالقىمىز. بارشامىزعا ورتاق قۇندىلىق دومبىرانى جان- جاقتى ناسيحاتتاپ، جاس ۇرپاقتىڭ ساناسىنا ءسىڭىرۋ وتە ماڭىزدى. دومبىرا اسپابى قايتالانباس اسىل دۇنيە. سوندىقتان مەكتەپتە دومبىرا ۇيرەنۋ ساباقتارىن ەنگىزۋ قاجەتتى ءارى دۇرىس باستاما. سەبەبى قازىرگى جاپپاي جاھاندانۋ ۋاقىتىندا حالقىمىزعا ءتان بىرەگەي قۇندىلىقتاردى جاڭعىرتا بەرۋىمىز كەرەك»، - دەدى مەملەكەت باسشىسى.
