اسان قايعىنىڭ ايتقاندارى
* ارعىماققا ءمىندىم دەپ ارتقى توپتان اداسپا.
* ەردىڭ قۇنى ءسوز ەمەس
ەسەبىن تاپقان سابازعا،
موينىن بۇرىپ ءسوز ايتپاس،
كوڭىلى قالعان ارازعا.
* مىنەزى جامان ادامعا ەندى قايتىپ جۋىسپا،
ءتاۋىر كورەر اداممەن جالعان نامىس قۋىسپا.
ەدىل بول دا، جايىق بول ەشكىممەنەن ۇرىسپا،
جولداسىڭا جاۋ تيسە جانىڭدى اياپ تۇرىسپا.
* بۇ زاماندا نە ءعارىپ - اق قالالى بوز ءعارىپ،
جاقسىلارعا ايتپاعان اسىل شىرىن ءسوز ءعارىپ.
* ادىلدىكتىڭ بەلگىسى - بىلە تۇرا بۇرماسا،
اقىلدىنىڭ بەلگىسى - وتكەن ءىستى قۋماسا.
* ەسەنىڭدە- تىرىڭدە ءبىر بولىڭىز ءبارىڭىز.
* عىلىمنىڭ قانداي پايداسى بىلمەستى جولعا سالماسا.
* اقىڭ بولسا بىرەۋدە - ايىبىن تاپ تا الا بەر،
ەرەگىسىپ ۇرىسپا: سەنىكى ءجون بولسا دا،
اتىڭ شىقپاس دۇرىسقا.
* كولدە جۇرگەن قوڭىر قاز قىر قادىرىن نە ءبىلسىن،
قىردا جۇرگەن دۋاداق سۋ قادىرىن نە ءبىلسىن،
ساناسى جوق جاماڭدار ەل قادىرىن نە ءبىلسىن.
* ارعىماعىڭ جامانداپ - تۇلپار قايدان تابارسىڭ،
تۇيعىنىڭدى جامانداپ - سۇڭقار قايدان تابارسىڭ.
* باقىت قونعان ەرلەردىڭ ءاربىر ءىسى وڭ بولار،
داۋلەتى كۇنگە ارتىلىپ، نە قىلسا دا مول بولار.
* ناداندىقتىڭ بەلگىسى - ءتىلىن الماۋ بىلگەننىڭ.
* ويىل دەگەن - ويىڭ- دى، وتىن تاپساڭ - تويىڭ- دى.
* كوشىپ- قونىپ كورمەگەن - جەر قادىرىن نە ءبىلسىن.
اقىلىنا كونبەگەن - جۇرت قادىرىن نە ءبىلسىن.
* «اتادان التاۋ تۋدىم» ، - دەپ اسقىنىپ جاۋاپ ايتپاڭىز،
«اتامنىڭ مالى كوپ- تى» - دەپ اتتى باسقا تارتپاڭىز.
* اشۋ - دۇشپان: ەسەپتەسىپ قۋىسپا،
ءتۇسىپ كەتسەڭ قايتەسىڭ، ءتۇبى تەرەڭ قۋىسقا.
* كولدىڭ سۋىن جامانداپ - ەدىل قايدان تابارسىڭ،
اكىمىڭدى جامانداپ - ءادىل قايدان تابارسىڭ،
جاسىعىڭدى جامانداپ - اسىل قايدان تابارسىڭ.
