تايسوندى جەڭگەن بوكسشىنى ساباعان قازاق: الماتىداعى كاسىپقويلار ايقاسى قالاي ءوتتى
قانات يسلامنىڭ جارقىن جەڭىسىنە دەيىن رينگكە شىققان توعىز سپورتشىمىز دا جەڭىس تۇعىرىنان كورىنىپ، بىرنەشە تيتۋلعا يە بولدى، دەپ حابارلايدى قازاقپارات ءتىلشىسى.
قاتارىنان ونىنشى جەڭىسىن تويلاعان ابىلايحان قۇسايىنوۆ NBA تيتۋلىنا يە بولدى. قارسىلاسى گ. ارۋتيۋنيان ءۇشىنشى راۋندتىڭ باسىندا- اق سىر بەرە باستاعان. ءۇش راۋند بويى بۇرىش ساعالاعان ارميان بوكسشىسىنىڭ باپكەرلەرى اقىرى شارشى الاڭعا ورامال تاستاۋعا ءماجبۇر بولدى. «مەنى قولداعان بارشاڭىزعا راحمەت. بۇل جەكپە- جەككە جاقسىلاپ دايىندالدىم. باپكەرىم مەن باۋىرلارىما العىسىم شەكسىز. ءوز ەلىمىزدە ءوتىپ جاتقاندىقتان، ايقاس الدىندا قوبالجۋ دا بولدى. ءالى دە وسى قارقىنىمنان تايماۋعا دايىنمىن» ، - دەدى ول جەكپە- جەكتەن كەيىن.
وسى كەشتە اۋىر سالماقتاعى رۋسلان مىرساتايەۆ دەنني ۋيليامستى نوكاۋتقا جىبەردى. وسىدان 15 جىل بۇرىن ايگىلى مايك تايسوندى شاۋ تارتقان شاعىندا قۇلاتىپ، اتى شىققان بريتاندىق بوكسشى رۋسلاننىڭ جويقىن سوققىلارىنا توتەپ بەرە المادى. 45 جاستاعى بريتاندىق 53-رەت كاسىپقوي رينگكە شىعىپ، 27- جەڭىلىسىنىڭ ءدامىن تاتتى. تاعى ءبىر قازاق بوكسشى ماديار اشكەيەۆ ۋكراينالىق يگور فانياننان تورەشىلەردىڭ شەشىمى بويىنشا باسىم ءتۇستى.10 راۋندقا جوسپارلانعان ايقاس جەتىنشى راۋندتا توقتاتىلدى. قازاقستاندىق سپورتشىنىڭ قاباعى جارىلىپ، دارىگەرلەر ونىڭ شارشى الاڭعا شىعۋىنا رۇقسات بەرمەدى. حالىقارالىق بوكس ەرەجەسىنە سايكەس، كەزدەسۋ توقتاعانعا دەيىن مادياردىڭ جيناعان ۇپايى كوپ بولعاندىقتان، جەڭىس ءبىراۋىزدان قازاق بوكسشىسىنا بەرىلدى. وسىلايشا ول NABF Junior جانە NABA تيتۋلدارىن قانجىعاسىنا بايلادى. ال اسا اۋىر سالماقتاعى نۇرسۇلتان امانجولوۆ بەلارۋستىق پاۆەل كرولەنكونى ۇتسا، ەكىنشى ورتا سالماقتا ارمان رىسبەك ۋكراينالىق دەنيس چەچەتانى ساباسىنا ءتۇسىردى.
ورتا سالماقتا ساپارباي ايداروۆ تاعى ءبىر ۋكراينالىق ۆلاديسلاۆ تانتسيۋرانى جەڭسە، ءبىرىنشى ورتا سالماقتا بەرىكباي نۇرىمبەتوۆ رەسەيلىك كارەن اۆەتيسياننان باسىم ءتۇستى. جارتىلاي ورتا سالماقتاعى اسقار ەرۋبەك بەلارۋس اندرەي ستوليارچۋكتى مويىنداتسا، جارتىلاي جەڭىل سالماقتاعى وزبەك بوكسشى بەكسۇلتان راۋشانوۆ ازەربايجاندىق اسقار راگيموۆتى جەڭدى. كەشتىڭ باستى كەزدەسۋىندە «قازاق» لاقاپ اتىمەن تانىمال قانات يسلام دومينيكالىق قارسىلاسىن 14 سەكۋندتا ۇرىپ جىقتى. بۇل ايقاسقا دايىندىق بارىسىندا قانات يسلام اياقتاعى جاراقاتىنان تولىق ايىققانىن ايتقان ەدى. ەسكە سالساق، ق ر پرەزيدەنتى قاسىم- جومارت توقايەۆ قانات يسلامنىڭ الداعى جەكپە- جەكتەرىنە ساتتىلىك تىلەگەن بولاتىن. بوكس كەشىنەن تىكەلەي ترانسلياتسيانى «Qazaqstan» جانە «Qazsport» تەلەارنالارى جۇرگىزدى.
