ديماش قۇدايبەرگەننىڭ فاناتى رەبەككا ءانشى وقىعان كوللەدجدە قازاقشا ءان سالدى
ءانشىنىڭ ۇستازى مارات ءايتىموۆ فاناتتىڭ تابيعي تالانتىنا تاڭعالدى، دەپ حابارلايدى قازاقپارات ءتىلشىسى.
ءانشى ديماش قۇدايبەرگەننىڭ «ارناۋ» كونسەرتىنە كەلگەن ءبىر توپ فانات نۇر-سۇلتان، الماتى، اقتوبە تۋرمارشرۋتىن تاڭداعان. ولار بۇل ءۇش قالانى ارالاۋعا 4 مىڭ ا ق ش دوللارىن جۇمسادى. اقتوبەگە كەلگەن فاناتتار اراسىندا ا ق ش، گاۆاي ارالى، مازايزيا، ۇلى بريتانيا مەن فرانسيا سەكىلدى ەۋروپانىڭ بىرنەشە قالاسىنىڭ تۇرعىنى بار.
ولار ادەتتەگىدەي مەشىت، شىركەۋ، مۋزەيگە بارىپ، ءانشى وقىعان مەكتەپتە، مۋزىكالىق كوللەدجدە بولدى. فاناتتار ءۇشىن ءانشىنىڭ ۇستازى مارات ايتىموۆپەن سۇحبات قىزىقتى ءوتتى.
ءارى ساحنادا ءان ايتۋعا مۇمكىندىك بەرىلىپ، ۆوكالدىق قابىلەتتەرى تۋرالى ءبىلدى. بارىنەن گاۆاي ارالىنان كەلگەن رەبەككانىڭ داۋىسى كوپتى تاڭقالدىردى. ول «ماحاببات بەر ماعان» ءانىن مۋزىكالىق سۇيەمەلدەۋسىز ورىنداپ شىقتى.
«رەبەككادا تابيعي تالانت بار. تىنىس الۋى جاقسى، ياعني، ادام سپورتپەن شۇعىلدانادى. سپورتپەن شۇعىلداناتىن ادام جوعارى نوتالاردى الماسا دا قينالماي جاقسى ءان ايتا الادى. مۋزىكانى ەستي الادى، قۇبىلتادى. ءان تازا شىقتى. ساحنادا ءسال قوبالجىعانى بايقالادى»، - دەدى ءانشىنىڭ ۇستازى مارات ءايتىموۆ.
ال فانات رەبەككا تاعى اقتوبەگە كەلسە مارات ايتىموۆتەن ساباق الاتىن بولدى. بۇعان دەيىن حابارلاعانىمىزداي، 25-ماۋسىمدا ءبىر توپ فانات اقتوبەگە كەلىپ، قالانىڭ كورىكتى جەرلەرىن ارالاعان بولاتىن. فاناتتار ءۇشىن ديماش قۇدايبەرگەننىڭ بالالىق شاعى، ستۋدەنتتىك كەزى قىزىقتى. ولار مارات ايتىموۆتەن ەستە قالار وقۋعالار تۋرالى ايتىپ بەرۋىن سۇرادى.
«ديماش مۋزىكالىق كوللەدجگە كەلگەندە 15 جاستا بولدى. داۋىسى وڭدەلمەگەن، قاراپايىم ەدى. قازىرگى داۋىسى وقۋمەن، ەڭبەكپەن كەلدى. ول ءتورت جىل بويى تىنباي داۋىسىمەن جۇمىس ىستەدى، جاتتىعۋلار جاسادى. باستىسى - تالانت. ءان ايتاتىن، داۋىسى بار ادامدار كوپ. ال ديماشتا تابيعي تالانت تا، اقىل دا بار. ءبارى توعىسقاندا الاپات كۇشكە اينالدى. فالتسەتتى مۋزىكالىق كوللەدجدە كوپ قولدانبايمىز. ديماش ءۇشىنشى كۋرستان باستاپ اۋەستەندى. العاشقى كەزدە تىيىم سالدىم. كوبىنە مەن كوللەدجدە بولماعان كەزدە بار داۋىسىمەن، فالتسەتپەن ءان ايتادى. داۋىسى بارلىق جەرگە ەستىلەدى. مەنىڭ كىرگەنىمدى بىلگەن كەزدە كوزىمە تۇسپەۋ ءۇشىن قاشىپ جۇرەدى. وزىنە «جۇدىرىق» تيەتىنىن بىلەدى»، - دەدى مارات ءايتىموۆ.
