ينتەرنەتكە قازاقستاندىقتاردىڭ جەكە دەرەكتەرى قالاي تاراپ كەتكەندىگى انىقتالۋدا
سونداي-اق ماسەلەمەن قۇقىققورعاۋ ورگاندارى اينالىسۋدا. بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ ايتتى، دەپ حابارلايدى قازاقپارات.
«بۇگىن جەلىدەن ازاماتتاردىڭ جەكە دەرەكتەرىن ينتەرنەتتە تاراتۋ تۋرالى اقپاراتتى كوردىم. وتە ماڭىزدى ماسەلە. دەرەككوزى مەن تارالۋ سەبەپتەرىن انىقتاۋدى تاپسىردىم. قۇقىققورعاۋ ورگاندارى قازىرگى ۋاقىتتا بۇل ماسەلەمەن اينالىسۋدا. تەحنولوگيالاردىڭ دامۋىنا وراي، جەكە دەرەكتەرگە قول جەتكىزۋدى قورعاۋ - بۇگىندە بۇكىل الەمدىك قوعامداستىق الدىندا وتكىر تۇرعان ماسەلەنىڭ ءبىرى. سىزدەر كوممەرتسيالىق نەمەسە مەملەكەتتىك اقپاراتتىق جۇيەلەردى بۇزۋعا قاتىستى ءبىرقاتار وقيعالاردى ەستىگەن بولارسىزدار. سول سەبەپتى، دەربەس دەرەكتەردى قورعاۋ بويىنشا ءبىزدىڭ كوميتەتىمىزگە ەۋروپاداعى Data Protection Agency-كە ۇقساس فۋنكتسيالاردى بەرۋ تۋرالى باستاما كوتەرگەن بولاتىنبىز»، - دەپ جازدى ول Facebook-تە.
ا. جۇماعاليەۆتىڭ اتاپ وتۋىنشە، بۇل فۋنكتسيا ازاماتتاردىڭ جەكە دەرەكتەرىن وڭدەۋمەن اينالىساتىن اقپاراتتىق جۇيەلەردىڭ يەلەرىنە تەكسەرۋ جۇرگىزۋگە قۇقىق بەرەدى.
«سونىمەن بىرگە، جەكە دەرەكتەردى قورعاۋدا ءتيىستى شارالار قولدانباعانى ءۇشىن جۇكتەلەتىن جاۋاپكەرشىلىكتى قاتايتۋ كەرەك. مۇنداي شارالار قازىر الەم بويىنشا قابىلدانۋدا»، - دەدى ول.
ايتا كەتەيىك، 4- شىلدە كۇنى «كيبەر شابۋىلداردى زەرتتەۋ جانە تالداۋ ورتالىعى» زاڭدى تۇلعالار بىرلەستىگى (كشزتو) Facebook-تە ينتەرنەتكە 11 ميلليون قازاقستاندىقتىڭ جەكە باس دەرەكتەرى تاراعاندىعى جونىندە جازدى. «قازاقستاننىڭ 11 ميلليون ازاماتىنىڭ جەكە مالىمەتتەرى ينتەرنەت جەلىسىندە قولجەتىمدى بولدى. وتكەن اپتادا كشزتو ماماندارى جەكە مالىمەتتەردىڭ عالامتورعا جايىلىپ كەتۋىنىڭ ەڭ ءىرى دەرەكتەرىنىڭ ءبىرىن بايقادى.
11 ميلليون ادام تۋرالى تولىق اقپاراتتىق بازا ينتەرنەت جەلىسىندە اشىق قولجەتىمدىلىكتە بولدى - بارلىعى دا ەلدىڭ كامەلەتكە تولعان حالقى. قالاعان كەز كەلگەن ادام جۇيەگە وڭاي قول جەتكىزە الا الدى نەمەسە ونى وزىنە تولىعىمەن جۇكتەي الدى. بازاداعى مالىمەتتەر جاڭا جانە جارتى جىل بۇرىن عانا اكتۋاليزاتسيالانعان. اقپاراتتىڭ جالپى قولجەتىمدىلىكتە ناقتى قانشا ۋاقىت بولعانى ازىرگە بەلگىسىز. دەگەنمەن، ونداعى بارلىق اقپارات Google جانە Yandex ىزدەۋ جۇيەلەرى ارقىلى يندەكساتسيالانىپ ۇلگەردى. دەرەكتەردىڭ تارالىپ كەتۋىنىڭ سەبەبى انىقتالۋدا. ءتيىستى ورگاندار حاباردار ەتىلدى جانە ونىڭ ءمان-جايى جاقىن ۋاقىتتا انىقتالاتىنىنا ۇمىتتەنەمىز. وسى حابار جاريالانىپ جاتقان ۋاقىتتاعى جاعداي بويىنشا، بازاعا قولجەتىمدىلىك جابىق تۇر»، - دەلىنگەن جاريالانعان پوستتا.
