قازاق وقۋشى ماتەماتيكادان حالىقارالىق وليمپيادانىڭ التىن جۇلدەسىن جەڭىپ الدى
ونى جەڭىسىمەن اتىراۋ وبلىسىنىڭ اكىمى نۇرلان نوعايەۆ جەكە قۇتتىقتادى، دەپ حابارلايدى قازاقپارات ءتىلشىسى.
كيپر ەلىنىڭ لارناكا قالاسىندا 23- جاسوسپىرىمدەر اراسىنداعى بالكان ماتەماتيكالىق وليمپياداسى ءوتتى، وعان 17 رەسمي كوماندادان قۇرالعان 112 ادام قاتىستى، ولاردىڭ ىشىندە 10 كوماندا بالكان ايماعىنان بولسا، قالعان 7 قوناقتىق كوماندالار، ونىڭ ىشىندە ءبىزدىڭ قازاقستان قۇراماسى دا بولدى. وليمپيادانى كيپر رەسپۋبليكاسىنىڭ ماتەماتيكتەر وداعى ۇيىمداستىرعان. قازاقستان كومانداسى بىرنەشە جىلدار بويى قوناق رەتىندە ۇزدىكسىز قاتىسىپ كەلەدى.
بالكان جاسوسپىرىمدەر وليمپياداسىنىڭ تاريحىندا تۇڭعىش رەت قازاقستان قۇراماسى بەيرەسمي كوماندالىق جارىستا 17 قاتىسۋشى كوماندالار اراسىندا ەكىنشى ورىنعا يە بولدى. وليمپيادا ناتيجەسى بويىنشا قازاقستان قۇراماسى ەكى التىن، ءۇش كۇمىس جانە ءبىر قولا مەدالدى جەڭىپ الدى. التىن مەدالدىڭ ءبىرىن اتىراۋلىق وقۋشى ايبەك مىرزاتايەۆ جەڭىپ الدى. وبلىس اكىمى نۇرلان نوعايەۆ ايبەك مىرزاتايەۆتى، ونىڭ اكەسى يساتاي سابيتوۆتى جانە ءبىلىم- يننوۆاتسيا ليتسەي- ينتەرناتىنىڭ ديرەكتورى ەلما يسمايلدى قابىلدادى.
«مەنىڭ ارىپتەستەرىم جانە مەن سىزدەردى شىن جۇرەكتەن قۇتتىقتايمىز جانە وسىنداي تابىسقا جەتكەنىڭىزگە قۋانىشتىمىز. ءسوز جوق، بۇل ءسىزدىڭ اتا-اناڭىزدىڭ جانە مۇعالىمدەرىڭىزدىڭ ەڭبەگى. قازىر سەن باسقا وقۋشىلارعا ۇلگى بولدىڭ، ەندىگى ساعان قاراپ باسقالارى بوي تۇزەيتىن بولادى. بارلىق ومىرلىك سىناقتاردا ءبىرىنشى ورىنداردا تۇرۋىڭا تىلەكتەسپىن»، - دەدى نۇرلان نوعايەۆ.
