قاسىم- جومارت توقايەۆ ءىرى كومپانيالاردى بىلىمىمەن بولىسۋگە شاقىردى
بۇل تۋرالى بۇگىن ەلوردادا وتكەن شەتەلدىك ينۆەستورلار كەڭەسىنىڭ وتىرىسىندا قر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ءبىلىم ەكونوميكاسى داۋىرىندە بۇكىل ءومىر بويى ءبىلىم الۋ ءرولى ارتا تۇسەدى. اسىرەسە بۇل رەتتە وسى قۇزىرەتتىڭ تاسىمالداۋشىسى سانالاتىن ءىرى ترانسۇلتتىق كورپوراتسيالارمەن ءوزارا ءىس- قيمىل ماڭىزدى» ، - دەدى قاسىم- جومارت توقايەۆ.
ق ر پرەزيدەنتىنىڭ اتاپ وتۋىنشە، سوڭعى ءۇش جىل ىشىندە جۇمىس بەرۋشىلەردىڭ قاراجاتى ەسەبىنەن 12 مىڭنان استام جاس ءبىلىم الدى.
«وسى تاجىريبەنى ءبىز ايتارلىقتاي كەڭەيتۋگە نيەتتىمىز. ونىڭ ىشىندە جۇمىس بەرۋشىلەردى ىنتالاندىرۋدى جولعا قويۋ ارقىلى دا كەڭەيتۋ ويدا بار. بۇگىنگى كۇنى قۇزىرەتتى دامىتۋ مەن بەرۋ اسىرەسە مۇناي- گاز- حيميا، جاڭا ماتەريالدار، كاسىپتىك قىزمەتتەر، اقپاراتتىق تەحنولوگيالار سىندى سالالاردا ۇلكەن قاجەتتىلىك بولىپ وتىر. ءبىزدىڭ بارلىق كومپانيالاردا بىلىكتىلىك ارتتىرۋ كۋرستارى، داعدىلانۋ باعدارلامالارى، جولعا قويىلعان ءبىلىم بەرۋ ادىستەمەسى، ءتىپتى كورپوراتيۆتىك ۋنيۆەرسيتەتتەر بار. وسىعان وراي ق ر ۇكىمەتىنە «قازاقستاندىق شەتەلدىك ينۆەتورلار كەڭەسى» قاۋىمداستىعىمەن بىرگە ءبىز ءۇشىن نەگىزگى سالالارداعى قۇزىرەت ترانسفەرتىن دامىتۋ بويىنشا جۇيەلى ۇسىنىستار ازىرلەۋدى تاپسىرامىن» ، - دەدى ق ر پرەزيدەنتى.
