داريعا نازاربايەۆا سەناتتىڭ ءتورتىنشى سەسسياسىنىڭ جۇمىسىن قورىتىندىلادى
«بۇگىن ءتورتىنشى سەسسياداعى سەناتتىڭ قورىتىندى جالپى وتىرىسىن وتكىزدىك. ءبىز حالقىمىزبەن بىرگە قازاقستان مەملەكەتى ءۇشىن اسا جاۋاپتى ءارى تاريحي وقيعالاردىڭ، تاعدىرلى شەشىمدەردىڭ كۋاسى بولدىق. سەسسيا بارىسىندا سەناتتىڭ اۋقىمدى جۇمىسى قارقىندى ءارى ناتيجەلى بولدى»، - دەپ توقتالدى د. نازاربايەۆا.
وسى ورايدا ول بۇل كەزەڭدە 83 ماڭىزدى زاڭ جوباسى جان-جاقتى پىسىقتالىپ، قابىلدانعانىن اتاپ ءوتتى. قابىلدانعان زاڭدار مەملەكەتتىڭ الەۋمەتتىك مىندەتتەمەلەرىن ورىنداۋعا، ەكونوميكانىڭ جەكەلەگەن سەكتورلارىنداعى جاعدايدى جاقسارتۋعا باعىتتالدى.
سەنات سپيكەرىنىڭ ايتۋىنشا، جالپى سەسسيا بارىسىندا سەناتورلار ۇكىمەتكە 100 دەن استام دەپۋتاتتىق ساۋال جولدادى. وتكىر ساۋالدار ارقىلى ەلىمىزدە شەشىمىن تاپپاي جۇرگەن ماسەلەلەرگە ءتيىستى مەملەكەتتىك ورگانداردىڭ نازارىن اۋدارىپ، ولاردى شەشۋ جولدارىن كورسەتە ءبىلدى.
«سەسسيادا سەناتتىڭ تۇراقتى كوميتەتتەرى وتكىزگەن ارنايى كەزدەسۋلەردە قابىلدانعان ۇسىنىمداردىڭ ورىندالۋى سەناتورلاردىڭ تۇراقتى باقىلاۋىندا بولاتىنىن ەسكەرتەمىن. الەمدىك ءتارتىپ تۇراقسىزدانا تۇسكەن جاعدايدا ەلىمىزدىڭ سىندارلى كوپۆەكتورلى سىرتقى ساياساتىن ىسكە اسىرۋدا پارلامەنتتىك ديپلوماتيانىڭ الاتىن ورنى ەرەكشە. سەناتورلار حالىقارالىق پارلامەنتتىك ۇيىمداردىڭ جۇمىسىنا تۇراقتى جانە بەلسەندى تۇردە قاتىسىپ كەلەدى. جالپى العاندا، مەملەكەتتىك، قوعامدىق-ساياسي جانە الەۋمەتتىك-ەكونوميكالىق ءومىرىنىڭ جاڭا كەزەڭىن زاڭنامالىق قامتاماسىز ەتۋ بويىنشا تىڭعىلىقتى جۇمىس اتقارىلدى دەپ ايتا الامىز. وسى رەتتە بارشاڭىزعا بەلسەندى ءارى ناتيجەلى قىزمەتتەرىڭىز ءۇشىن ريزاشىلىعىمىزدى بىلدىرەمىز»، - دەدى داريعا نازاربايەۆا.
ەسكە سالا كەتەيىك، پارلامەنتتىڭ ءتورتىنشى سەسسياسى 2019-جىلعى 5- شىلدەگە دەيىن ۇزارتىلدى.
اتاپ ايتقاندا، ماڭىزدى شارالاردى ىسكە اسىرۋ ءۇشىن 2019-2021-جىلدارعا ارنالعان رەسپۋبليكالىق بيۋجەت تۋرالى زاڭعا وزگەرىستەردى ەنگىزۋ قاجەت بولدى. وسىعان بايلانىستى بيۋجەتكە ەنگىزىلەتىن وزگەرىستەردى قاراستىرۋ ءۇشىن پارلامەنت سەسسياسىنىڭ جۇمىس مەرزىمى ۇزارتىلدى.
بۇگىن پارلامەنت سەناتىنىڭ جالپى وتىرىسىندا پالاتا دەپۋتاتتارى «2019-2021-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرىستەر مەن تولىقتىرۋار ەنگىزۋ تۋرالى» زاڭىن قابىلدادى.
