ارىس قالاسىن قالپىنا كەلتىرۋگە قانشا قارجى كەرەكتىگى ناقتىلاندى
جالپى وتىرىس بارىسىندا سەناتور ءالي بەكتايەۆ ۇكىمەت رەزەرۆىن 72,2 ميلليارد تەڭگەگە ۇلعايتۋ ەسكەرىلىپ وتىرعانىن ايتا كەلە، وسى قارجىنىڭ قاي بولىگى ارىستاعى توتەنشە جاعداي سالدارىن جويۋعا جۇمسالاتىنىن سۇرادى.
ءوز كەزەگىندە ق ر پرەمەر-ءمينيسترىنىڭ ءبىرىنشى ورىنباسارى-قارجى ءمينيسترى ءاليحان سمايىلوۆ ارىس قالاسىنا قاجەتتى قارجى بويىنشا الدىن الا ەسەپتەۋلەر جۇرگىزىلگەنىن اتاپ ءوتتى.
«ارىس قالاسى بويىنشا 1- شىلدەدەگى الدىن الا ەسەپتەۋلەرگە سايكەس، 34,5 ميلليارد تەڭگە كەرەك. سونىڭ ىشىندە ءاربىر تۇرعىنعا 100 مىڭ تەڭگە مولشەرىندە اقشالاي وتەماقى تولەۋ ءۇشىن 4,5 ميلليارد تەڭگە ەسكەرىلگەن. وسى ورايدا ۇكىمەت رەزەرۆىنەن 2 ميلليارد تەڭگە، تۇركىستان وبلىسى بيۋجەتىنەن 1 ميلليارد تەڭگە جانە قايىرىمدىلىق كومەك ەسەبىنەن 1,5 ميلليارد تەڭگە قامتىلعان»، - دەدى مينيستر.
ونىڭ سوزىنە قاراعاندا، 7709 تۇرعىن ءۇيدى قالپىنا كەلتىرۋ قاراستىرىلعان. سونىڭ ىشىندە 49 ءۇي قيراعان.
«19,2 ميلليارد تەڭگە كەرەك. ونىڭ 50 پايىزى باسقا وڭىرلەردىڭ بيۋجەتى ەسەبىنەن بولادى، ال قالعان 50 پايىزى ۇكىمەت رەزەرۆىنەن بولىنەدى. 66 الەۋمەتتىك نىساندى قالپىنا كەلتىرۋگە 7 ميلليارد تەڭگە كەرەك. بۇل تۇرعىدا 54 ءبىلىم بەرۋ، 8 دەنساۋلىق ساقتاۋ، 4 سپورت نىسانى قامتىلادى. 6 ميلليارد تەڭگەسىن «سامۇرىق-قازىنا» قورى بولەدى جانە 1 ميلليارد تەڭگە بيزنەس قاۋىمداستىقتان كەلەدى»، - دەپ ءتۇسىندىردى ۇكىمەت باسشىسىنىڭ ءبىرىنشى ورىنباسارى.
سۋمەن جانە ەلەكتر قۋاتىمەن، جىلۋمەن جابدىقتاۋ ينفراقۇرىلىمىن جوندەۋ ءۇشىن 2,2 ميلليارد تەڭگە ۇكىمەت رەزەرۆىنەن بولىنەدى. اكىمشىلىك 34 عيمارات ءۇشىن 1,7 ميلليارد تەڭگە كەرەك، ول دا ۇكىمەت رەزەرۆىنەن بولىنەدى.
«ناتيجەسىندە، ۇكىمەت رەزەرۆىنەن 15,5 ميلليارد تەڭگە، جەرگىلىكتى بيۋجەتتەردەن 10,6 ميلليارد تەڭگە، «سامۇرىق-قازىنا» قورىنان 6 ميلليارد تەڭگە، دەمەۋشىلىك جانە قايىرىمدىلىق كومەك ەسەبىنەن 2,5 ميلليارد تەڭگە جوسپارلانىپ وتىر.
دەگەنمەن، بارلىق تەكسەرۋ جانە ەسەپتەۋ جۇمىستارى اياقتالعاننان كەيىن، بۇل سيفرلار وزگەرۋى مۇمكىن. سونىمەن بىرگە، ارىس قالاسىنىڭ شاعىن جانە ورتا بيزنەسى ءۇشىن «بايتەرەك» حولدينگى تاراپىنان التى ايلىق جەڭىلدىك كەزەڭىمەن 48 ايعا دەيىن ءبىر پايىز مولشەرلەمە بويىنشا 5 ميلليون تەڭگەگە دەيىن جەڭىلدىك نەسيە بەرىلەتىن بولادى»، - دەدى ول.
