ءومىرزاق شوكەيەۆ ارىستاعى قۇرىلىس-جوندەۋ جۇمىستارىمەن تانىستى
بۇل تۋرالى قازاقپارات اكىمدىكتىڭ باسپا ءسوز قىزمەتىنە سىلتەمە جاساپ حابارلايدى.
ءاربىر وبلىسقا قاراستى تۇرعىن ۇيلەردى ارالادى. ءوڭىر باسشىسى اۋەلى جامبىل وبلىسى شتابىنا ايالداپ، جۇمىسشى توپپەن كەزدەستى. وبلىس اكىمى جوندەۋ جۇمىستارى بويىنشا ءاربىر شتاب ونلاين جۇيەدە ەسەپ بەرىپ وتىرۋ قاجەتتىگىن ايتتى.
كەيىن جامبىل وبلىسىنا قاراستى 3-سەكتورداعى جوندەۋدەن ءوتىپ جاتقان جەكە تۇرعىن ۇيلەردى كوردى. تۇرعىندارمەن كەزدەسكەن ءومىرزاق ەستاي ۇلى بارلىق قۇرىلىس-جوندەۋ جۇمىستارى 1 ايدا اياقتالىپ، قالا جاڭا كەيىپكە ەنەتىنىن جەتكىزدى.
ايتا كەتەرلىگى، ارىس قالاسىنىڭ اۋماعى 17 سەكتورعا بولىنگەن. ونىڭ ىشىندە، جامبىل وبلىسىنا 11 كوشەدە ورنالاسقان 327 جەكە تۇرعىن ءۇيدى قالپىنا كەلتىرۋ جۇمىستارى جۇكتەلگەن. بۇدەن بولەك، 14 الەۋمەتتىك جانە كوممەرتسيالىق نىساندار بار.
قازىرگى تاڭدا جامبىلدىق قۇرىلىسشىلار مەن ەرىكتىلەر ءوز اۋماعىنداعى ۇيلەردى قالپىنا كەلتىرۋ جۇمىسىنا بەلسەنە كىرىسكەن. سونىڭ ناتيجەسىندە 5 جەكە تۇرعىن ءۇيدىڭ جوندەۋ جۇمىستارى تولىق اياقتالىپ وتىر.
ارىس قالاسىن قالپىنا كەلتىرۋ بويىنشا جامبىلدىق 16 قۇرىلىس كومپانياسىنىڭ 180 قۇرىلىسشىسى جۇمىلدىرىلعان. ولار قازىرگى تاڭدا 43 تۇرعىن ءۇيدىڭ جوندەۋ جۇمىستارىن قىزۋ اتقارۋدا.
سونىمەن قاتار، وبلىس اكىمى اتىراۋ وبلىسىنا قاراستى 1-سەكتوردىڭ جۇمىسىمەن تانىستى. اتىراۋلىق ايماققا 450 نىسان قارايدى. باتىستىق 9 كومپانيادان 200 گە جۋىق جۇمىسشى جوندەۋ جۇمىستارىنا بەلسەنە كىرىسكەن. ءومىرزاق شوكەيەۆ قۇرىلىس جۇمىستارىن ۋاقىتىندا ساپالى ەتىپ اياقتاۋدى تاپسىردى.
