داريعا نازاربايەۆانىڭ ءتوراعالىق ەتۋىمەن سەناتتا بيۋرو وتىرىسى ءوتتى
حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحاممەد سەناتورلاردىڭ ارىس قالاسىنا ساپارىنىڭ قورىتىندىلارى تۋرالى بيۋرو مۇشەلەرىن جان-جاقتى حاباردار ەتتى.
سەناتورلار د. نازاربايەۆانىڭ تاپسىرماسى بويىنشا ەۆاكۋاتسيا پۋنكتتەرىنە بارىپ، ادامداردىڭ ورنالاسۋ جاعدايىمەن، جارىلىس سالدارىن جويۋ جونىندەگى شتابتىڭ جۇمىسىمەن تانىستى، قالانى ارالاپ تۇرعىندارىمەن كەزدەستى.
پارلامەنت سەناتىنىڭ 4- شىلدەدە بولاتىن وتىرىسىنىڭ كۇن ءتارتىبى بەلگىلەندى. سەناتورلار «2019-2021-جىلدارعا ارنالعان رەسپۋبليكالىق بيۋجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن جانە دەپۋتات ا. قاپباروۆانىڭ انت بەرۋى مەن ونى تۇراقتى كوميتەتتىڭ قۇرامىنا سايلاۋ تۋرالى ماسەلەلەردى قارايتىن بولدى.
بيۋرو مۇشەلەرى مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى جونىندەگى زاڭناماعا تۇزەتۋلەردى قاراۋدى كۇزگە قالدىرۋدى ۇيعاردى. كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ ءتوراعاسى گ. كيم زاڭ جوباسى ودان ءارى پىسىقتاۋدى قاجەت ەتەتىنىن اتاپ ءوتتى.
«كەشە ءبىز تۇراقتى كوميتەتتەردىڭ سوڭعى قورىتىندىلارىن الدىق، بارلىق قورىتىندىلاردى كەستەگە ەنگىزگەندە 21 تۇزەتۋ بولدى. ەڭ باستىسى، قىركۇيەكتە سىبايلاس جەمقورلىققا قارسى ءىس-قيمىل جونىندەگى نەگىزگى زاڭ پارلامەنتكە كەلەدى. وسىعان بايلانىستى، اتالعان زاڭ جوباسىن پىسىقتاپ، كۇزگە قالدىرۋ، ءسويتىپ نەگىزگى زاڭمەن سايكەستەندىرۋ ءارى كەلىسۋ ارقىلى جاقسى ناتيجەگە شىعۋ تۋرالى ۇسىنىس بار»، - دەدى گ. كيم. سەناتور ب. ءايتىموۆا زاڭ جوباسىن قاراۋدى كۇزگە اۋىستىرۋ تۋرالى ۇسىنىسقا قولداۋ ءبىلدىردى.
«مەندە كۆازيمەملەكەتتىك سەكتور بويىنشا سۇراقتار قالىپ وتىر، ونى ءالى پىسىقتاۋ كەرەك. وندا لاۋازىمدى تۇلعالاردان شىعارىلىپ، تەڭەستىرىلگەندەرگە اۋىستىرىلادى، وسىعان بايلانىستى، وسىنىڭ ءبارى ارنايى جاسالعان سياقتى سەزىلەدى، لوببي كورىنىس تابۋدا»، - دەدى ب. ءايتىموۆا. بيۋرودا سەناتورلار كەڭەسىن قۇرۋ تۋرالى ماسەلە دە ماقۇلداندى. كەڭەس سەناتتىڭ بۇرىنعى دەپۋتاتتارىن، كورنەكتى مەملەكەت قايراتكەرلەرىن پالاتا جۇمىسىنا تارتۋ، تاجىريبە الماسۋ، پارلامەنتاريزمدى دامىتۋعا باعىتتالعان شارالاردى وتكىزۋ ماقساتىندا قۇرىلعان اقىلداستىق-كەڭەسشى ورگان بولادى.
سەنات باسشىسى دەپۋتاتتاردىڭ الداعى ايماقتارعا ساپارلارىنا بيۋرو مۇشەلەرىنىڭ نازارىن اۋداردى. كەزدەسۋلەر ءبىرسارىندى وتپەگەنى ماڭىزدى ەكەنىن ايتىلدى.
«ەڭبەك ۇجىمدارىن، زاۋىتتاردى، شاحتالاردى ارالاڭىزدار، باتىس ايماقتارداعى مۇنايشىلارمەن كەزدەسىڭىزدەر. ءماسليحات دەپۋتاتتارىمەن كەزدەسۋلەر وتكىزىڭىزدەر، اۋىلدارعا بارىڭىزدار، ءتورتىنشى دەڭگەيدەگى بيۋجەت، جەرگىلىكتى ءوزىن-ءوزى باسقارۋ قالاي جۇمىس ىستەيدى؟ اكىمدەرمەن، اۋىل تۇرعىندارىمەن سويلەسىڭىزدەر. بۇرىنعى قالىپتاسقان داعدىنى وزگەرتەيىك، تۇرعىنداردىڭ ۇيلەرىنە كىرىپ، ءدام تاتىپ، فۋنكتسيونەر ەمەس، قاراپايىم ادام رەتىندە اڭگىمەلەسىڭىزدەر»، - دەدى د. نازاربايەۆا.
