يتاليانىڭ نەاپول قالاسىندا جازعى ۋنيۆەرسيادا باستالدى

جازعى ۋنيۆەرسيادا ويىندارىنىڭ اشىلۋ سالتاناتىندا الەمنىڭ 19 مەملەكەتىنەن 800 گە جۋىق ونەرپاز كەلدى. ولاردىڭ اراسىندا ەڭ تانىمالى رەتىندە يتاليان ءانشىسى اندرەا بوچەلليدى اتاپ وتۋگە ابدەن بولادى.

جينالعاندار الدىندا يتاليا پرەزيدەنتى سەردجو ماتتارەللا ءوز تىلەكتەستىگىن ءبىلدىردى. جازعى ۋنيۆەرسيادا ويىندارى 3-14- شىلدە ارالىعىندا وتەدى. وعان الەمنىڭ 170 مەملەكەتىنەن سپورتشىلار كەلەدى دەپ جوسپارلانىپ وتىر. وندا 5971 ۇمىتكەر سپورتتىڭ 18 تۇرىنەن 222 مەدال جيىنتىعىن ساراپقا سالادى.

جارىسقا قاتىسۋشىلار فۋتبول، باسكەتبول، ۆولەيبول، سۋ دوبى، سۋدا ءجۇزۋ، سۋعا سەكىرۋ، سپورتتىق گيمناستيكا، كوركەم گيمناستيكا، دزيۋدو، جەڭىل اتلەتيكا، ۇستەل تەننيسى، جەلكەندى سپورت، رەگبي، نىسانا كوزدەۋ، ساداقپەن اتۋ، تەننيس، تاەكۆوندو، سەمسەرلەسۋ سەكىلدى سپورت تۇرلەرىنەن باق سىنايدى.

يتاليا جازعى ۋنيۆەرسيادا ويىندارىن ءوز تاريحىندا ءتورتىنشى مارتە قابىلداپ وتىر. اتالمىش ءدۇبىرلى دودا 1959 جانە 1970-جىلدارى تۋريندە، 1975-جىلى ريم قالاسىندا جالاۋىن كوتەردى.

ال قىسقى ۋنيۆەرسيادا ويىندارى بۇل مەملەكەتتە التى مارتە وتكەن. ۋنيۆەرسيداعا قاتىسۋشىلارعا قويىلاتىن تالاپتار بار. قۇراماعا ىلىككەن جاستار سول ەلدىڭ ازاماتى بولۋى ءتيىس. سونداي-اق، جاسى 17 دەن تومەن جانە 28 دەن جوعارى بولماۋى تالاپ ەتىلەدى.

باستى تالابىنىڭ ءبىرى - جوعارى وقۋ ورىندارىنىڭ ستۋدەنتى نەمەسە ونى بىتىرگەنىنە ءبىر جىلدان اسپاۋى قاجەت. بيىلعى جازعى ۋنيۆەرسيادا ويىندارىندا ءبىزدىڭ ەلىمىزدىڭ اتىنان 94 سپورتشى ەل نامىسىن قورعايدى.

ولاردىڭ اراسىندا سەمسەرلەسۋدەن 18 قازاقستاندىق سپورتشى قاتىسادى. ال 16 ى جەڭىل اتلەتيكادا جارىس جولىنا شىقسا، 15 ءى تاەكۆوندودان تايتالاسقا تۇسەدى.

ال ساداقپەن اتۋدان 8، نىسانا كوزدەۋدەن 10، سپورتتىق جانە كوركەم گيمناستيكادان 6، تەننيستەن 4، دزيۋدودان 10، سۋعا جۇزۋدەن 7 سپورتشى قاتىسادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى