ەلوردالىق جەدەل جاردەم بريگاداسى ارىستا ءولىم اۋزىندا جاتقان ناۋقاستى قۇتقاردى
بۇل جونىندە دەنساۋلىق ساقتاۋ مينيسترلىگىنە سىلتەمە جاساپ قازاقپارات حابارلايدى.
دارىگەرلەر دەر كەزىندە شۇعىل شەشىم قابىلداپ، ناتيجەسىندە پاتسيەنتتى كلينيكالىق اجالدان اراشالاپ قالدى.
«بۇگىن تاڭعى ساعات 07:40-تا ارىس قالالىق جەدەل جاردەم ستانساسىنىڭ پۋلتىنە 1989 -جىلى تۋعان ەر ادام تۋرالى قوڭىراۋ ءتۇستى. وعان الدىن الا «ەلەكتر جاراقاتىن العان» دەگەن دياگنوز قويىلعان. ال سول ساتتە كەزەكشىلىكتە جەرگىلىكتى دارىگەرلەرمەن بىرگە نۇر-سۇلتان قالاسىنىڭ ماماندارى دا بولعان. دارىگەرلەر وقيعا ورنىنا شۇعىل جەتكەن كەزدە پاتسيەنت ەس- ءتۇسسىز، كلينيكالىق ءولىم اۋزىندا جاتقان. اق حالاتتىلار جەدەل جۇرەك- وكپە رەانيماتسياسى كەشەنىن جاساعان سوڭ جاس جىگىت ەسىن جيعان» دەلىنگەن حابارلامادا.
وسىدان كەيىن ناۋقاس سانيتارلىق بورتپەن شىمكەنت قالاسىنا جەتكىزىلدى. قازىر پاتسيەنتتىڭ جاعدايى تۇراقتى، ومىرىنە ەش قاۋىپ جوق. ول قالالىق كارديولوگيالىق ورتالىقتا ەم الىپ جاتىر.
