باس اسكەري پروكۋراتۋرا ارىس اپاتى تۋرالى: ازىرگە ناقتى كۇدىكتى جوق
باس اسكەري پروكۋروردىڭ ورىنباسارى دارحان ەرجانوۆتىڭ ايتۋىنشا، جارىلىسقا كىنالى رەتىندە كۇدىكتىلەردى اتاۋعا ءالى ەرتە.
«اۋەلى تەرگەۋ جوسپارى قۇرىلعان بولاتىن. سول جوسپارعا ساي ەكى باعىت بويىنشا جۇمىس ءجۇرىپ جاتىر. ءبىرىنشى كەزەڭدە وقيعا ورنىن زەرتتەۋ ارقىلى توتەنشە وقيعانىڭ سەبەبىن انىقتاۋعا كۇش سالىنادى. اسكەري قويمانىڭ جۇمىسىنا قاتىستى قۇجاتتاردىڭ ءبارىن كوتەرىپ جاتىرمىز. وسى كەزەڭدە بۇگىنگە دەيىن 100 دەن استام ادامنان جاۋاپ الدىق. ازىرگە كۇدىكتىلەر تۋرالى ايتۋعا ەرتە. ماماندار قازىر اپات كەزىندەگى دالەلدەر مەن ايعاق زاتتاردى تىركەپ جاتىر»، - دەدى اسكەري پروكۋراتۋرا وكىلى.
باس اسكەري پروكۋروردىڭ ورىنباسارى تەرگەۋ جۇمىستارىنىڭ 2-5 اي كولەمىندە جۇرەتىنىن ايتادى.
«قىلمىستىق پروتسەسسۋالدىق زاڭناماعا سايكەس مۇنداي تەكسەرۋلەر 2 اي كولەمىندە ءجۇرۋى ءتيىس. ەگەر وسى ۋاقىت ىشىندە جەتكىلىكتى دالەلدەر جينالماسا، قىلمىستىق ءىس 4-5 ايعا دەيىن سوزىلۋى مۇمكىن»، - دەدى دارحان ەرجانوۆ.
