باسپانانى جالعا العان جاس وتباسى ايىنا قانشا اقشا تولەيدى؟
بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر اقپارات جانە قوعامدىق دامۋ ۆيتسە-ءمينيسترى جۇلدىز وماربەكوۆا ايتتى، دەپ حابارلايدى قازاقپارات ءتىلشىسى.
«جاس ادامنىڭ ومىرلىك كەزەڭى بار. ول ءبىلىم الادى، جۇمىسقا تۇرادى جانە سودان كەيىنگى ماسەلە - ونىڭ شاڭىراق كوتەرۋى. بىزدە اجىراسۋ دەڭگەيى جوعارى بولىپ تۇر. باسپانا وتباسىنداعى نەگىزگى پروبلەما بولماسا دا، سولاردىڭ ءبىرى ەكەندىگى تۇسىنىكتى. بيىل جالدامالى پاتەرلەر باعدارلاماسىن ىسكە قوستىق. نۇر-سۇلتان، الماتى جانە شىمكەنت قالالارىنىڭ ءارقايسىسىندا 1 مىڭنان پاتەر بەرىلەدى. وعان ساتىپ الۋ قۇقىعى بەرىلمەيدى. جاس وتباسى اياعىنان تۇرىپ كەتكەنشە مۇمكىندىك جاسالادى. بىزدە «7-20-25»، تۇرعىن ءۇي قۇرىلىس جيناق بانكى، «بايتەرەك» جەلىلەرى بويىنشا مەملەكەتتىك باعدارلامالار بار. ءبىراق، ولاردىڭ بارلىعىندا دا باسپانا الۋ ءۇشىن باستاپقى قاراجات جيناۋ قاجەت. ال تاپقان تابىسىڭنىڭ ءبارى پاتەر جالداۋعا كەتسە، قالاي قاراجات جيناي الاسىڭ؟»، - دەدى جۇلدىز وماربەكوۆا.
وسى ورايدا ۆيتسە-مينيستر جاستارعا جالدامالى پاتەر بەرۋگە ارنالعان باعدارلامانى تەڭدەسى جوق اكسيا دەپ سانايتىنىن ايتتى.
«قىركۇيەكتە قۇجات جيناۋ باستالادى. باسپانا الۋ ەرەجەسى ءبىزدىڭ سايتىمىزدا 1- تامىزدا جاريا ەتىلەدى. بۇل - ەڭ الدىمەن 29 جاسقا دەيىنگى ازاماتتارعا بەرىلەتىن مۇمكىندىك. ەگەر ونىڭ وتباسى بولسا نەمەسە قاراۋىندا مۇگەدەك اتا-اناسى نە مۇگەدەك بالاسى بولسا، وندا قوسىمشا بونۋس بەرىلەدى. جالدامالى پاتەر 3 تەن 5 جىلعا دەيىنگى مەرزىمگە ارنالعان. قازىرگى ۋاقىتتا جەرگىلىكتى اتقارۋشى ورگاندارمەن جانە باسقا دا مينيسترلىكتەرمەن شارتتار جاسالىپ جاتىر»، - دەدى ول.
سونىمەن قاتار ول جاستار جالعا العان پاتەرگە اي سايىن تولەيتىن بولجامدى سومانى اتادى.
«ءسىز جالدامالى پاتەرگە ايىنا شامامەن 10-12 مىڭ تەڭگە تولەيسىز. بۇل - اقشا جيناۋىڭىزعا مۇمكىندىك بەرەتىن سوما. پاتەر الۋ ءۇشىن ەڭ ماڭىزدى شارت - تۇرعىن ءۇي قۇرىلىس جيناق بانكىنەن ەسەپشوت اشۋ، مەملەكەتتىك باعدارلاماعا قاتىسۋ. ياعني، ءبىز باسپانا ساتىپ العىڭىز كەلەتىنىن، قارجى جيناپ جاتقانىڭىزدى كورۋىمىز كەرەك. باعدارلاما ءومىردى ەندى باستاعان جاس وتباسىلار مەن جاستاردى قولداۋعا ارنالعان. 3-5 جىلدىڭ ىشىندە يپوتەكا الۋ ءۇشىن ەڭ تومەنگى جارنانى جيناۋعا بولادى. ودان كەيىن ول وتباسىلىق نەمەسە ەڭبەك جولىن جاڭا باستاعان، كومەككە مۇقتاج كەلەسى جاستارعا پاتەردى بوساتىپ بەرۋى ءتيىس»، - دەدى ۆيتسە-مينيستر.
