باس اسكەري پروكۋراتۋرا ارىس اپاتىنىڭ ىقتيمال سەبەپتەرىن اتادى
ق ر باس اسكەري پروكۋروردىڭ ورىنباسارى دارحان ەرجانوۆتىڭ ايتۋىنا قاراعاندا، اتالمىش توتەنشە وقيعا بويىنشا قىلمىستىق كودەكستىڭ 462- بابىنىڭ 3- بولىمىمەن سوتقا دەيىنگى تەرگەۋ ءجۇرىپ جاتىر. بۇگىنگە دەيىن 100 ادامنان جاۋاپ الىنعان.
«اتالمىش باپ قارۋ-جاراقپەن، اينالاعا قاۋىپ توندىرەتىن زاتتارمەن جۇمىس ىستەۋ قاعيدالارىن بۇزۋ فاكتىلەرىن قامتيدى. ابايسىزدىق سالدارىندا 2 نەمەسە ودان دا كوپ ادامنىڭ ءولىمى تىركەلسە، جاۋاپتى تۇلعالاردى 5 تەن 10 جىلعا دەيىن باس بوستاندىعىنان ايىرۋ جازاسى قاراستىرىلعان»، - دەدى اسكەري پروكۋراتۋرا وكىلى.
ق ر باس اسكەري پروكۋروردىڭ اعا كومەكشىسى ەركىن قوجا-احمەتتىڭ ايتۋىنشا اسكەري قويما جارىلىسىنا بىرنەشە جايت سەبەپ بولۋى مۇمكىن.
«ارىس قالاسىنداعى 44859№ اسكەري ءبولىمنىڭ وق-دارىلەر قويماسىنداعى جارىلىستىڭ سەبەبى رەتىندە كوپتەگەن فاكتورلار قارالىپ جاتىر. سونىڭ ىشىندە ورتكە قارسى قاۋىپسىزدىك ەرەجەلەرىنىڭ ساقتالماۋى، لاۋازىمدى تۇلعالاردىڭ سالعىرتتىعى سياقتى نۇسقالار زەرتتەلۋدە. وق-دارىلەر ساقتالاتىن قويمالاردىڭ قاۋىپسىزدىگىن ساقتاۋعا بولىنگەن بيۋجەتتىك قاراجاتتىڭ ۇتىمدى پايدالانىلۋى، جارىلعىش زاتتاردىڭ دۇرىس جينالۋى تەكسەرىلۋدە. قويمالاردا انىقتالعان بۇزۋشىلىقتاردىڭ ۋاقتىلى جويىلعانى، ال جويماعان بولسا، اسكەري قىزمەتشىلەردىڭ ارەكەتسىزدىگى جايلى ءىس قارالادى. تەرگەۋ كەزىندە جاۋاپتى تۇلعالاردىڭ ءىس-ارەكەتتەرىنە قۇقىقتىق باعا بەرىلەتىن بولادى. جوعارىدا اتالعان سارالاۋ مەن نۇسقالار الدىن الا بولجام ەكەنىن ايتا كەتۋ كەرەك»، - دەدى ول.
باس اسكەري پروكۋراتۋرا وكىلدەرىنىڭ ايتۋىنشا، اتالمىش تەكسەرۋدى ىشكى ىستەر مينيسترلىگىنىڭ تاجىريبەلى ماماندارى جۇرگىزەتىن بولادى. تەرگەۋگە جاۋاپتى ورگانداردىڭ جۇمىسىن ءتيىمدى ۇيلەستىرۋ ماقساتىندا اسكەري جانە اۋماقتىق پروكۋراتۋرا وكىلدەرى تارتىلعان.
ايتا كەتسەك، ق ر توتەنشە جاعدايلار كوميتەتىنىڭ ءتوراعاسى ۆلاديمير بەككەر ارىستاعى اپاتتىڭ شىعىن كولەمىن شامامەن 20 ميلليارد تەڭگە دەپ باعالاعان بولاتىن. قازىر ارىس ارقىلى جۇرەتىن جولاۋشىلار پويىزدارىنىڭ ءجۇرۋ كەستەسى تولىق قالپىنا كەلتىرىلگەن. تۇركىستان وبلىسى اكىمىنىڭ تاپسىرماسىمەن ارىستاعى كاسىپكەرلەر 2020-جىلعا دەيىن سالىقتان بوساتىلىپ وتىر.
