بۇگىن جازعى ۋنيۆەرسيادا ويىندارى باستالادى
جازعى ۋنيۆەرسيادا ويىندارى 3-14- شىلدە ارالىعىندا وتكىزىلەدى. وعان الەمنىڭ 170 مەملەكەتىنەن سپورتشىلار كەلەدى دەپ جوسپارلانىپ وتىر. وندا 5971 ۇمىتكەر سپورتتىڭ 18 تۇرىنەن 222 مەدال جيىنتىعىن ساراپقا سالادى.
جارىسقا قاتىسۋشىلار فۋتبول، باسكەتبول، ۆولەيبول، سۋ دوبى، سۋدا ءجۇزۋ، سۋعا سەكىرۋ، سپورتتىق گيمناستيكا، كوركەم گيمناستيكا، دزيۋدو، جەڭىل اتلەتيكا، ۇستەل تەننيسى، جەلكەندى سپورت، رەگبي، نىسانا كوزدەۋ، ساداقپەن اتۋ، تەننيس، تاەكۆوندو، سەمسەرلەسۋ سەكىلدى سپورت تۇرلەرىنەن باق سىنايدى.
جازعى ۋنيۆەرسيادا ويىندارىنىڭ اشىلۋ سالتاناتى بۇگىن «سان پاولو» ستاديونىندا وتەدى.
اتالمىش ستاديوننىڭ اشىلعانىنا بيىل 60 جىل تولادى. 1960-جىلعى جازعى وليمپيادادا وندا ءبىرقاتار ويىندار بولدى.
ايتا كەتەرلىگى، يتاليا جازعى ۋنيۆەرسيادا ويىندارىن ءوز تاريحىندا ءتورتىنشى مارتە قابىلداپ وتىر. اتالمىش ءدۇبىرلى دودا 1959 جانە 1970-جىلدارى تۋريندە، 1975-جىلى ريم قالاسىندا جالاۋىن كوتەردى. ال قىسقى ۋنيۆەرسيادا ويىندارى بۇل مەملەكەتتە التى مارتە وتكەن.
ستۋدەنتتىك سپورت شاراسىنىڭ تاريحى 1905-جىلدان باستاۋ الادى. سول جىلى ا ق ش- تا ستۋدەنتتەر اراسىندا حالىقارالىق جارىس وتكىزىلدى. 1919-جىلى ستۋدەنتتەر كونفەدەراتسياسى قۇرىلدى. سول ۇيىمنىڭ قولداۋىمەن 1923-جىلى فرانسيا استاناسى - پاريج قالاسىندا بۇكىل الەمدىك ۋنيۆەرسيتەتتىك ويىندار بولىپ ءوتتى.
ءدۇبىرلى دودا 1957-جىلعا دەيىن ءدال سول اتاۋمەن ۇيىمداستىرىلدى. 1959-جىلى قازىرگى اتاۋىنا يە بولدى. سودان بەرى بيىل ءدۇبىرلى دودادا وتىزىنشى مارتە سايىسقا قاتىسۋشىلاردى قابىلدايتىن بولادى.
ۋنيۆەرسيداعا قاتىسۋشىلارعا قويىلاتىن تالاپتار بار. قۇراماعا ىلىككەن جاستار سول ەلدىڭ ازاماتى بولۋى ءتيىس. سونداي-اق، جاسى 17 دەن تومەن جانە 28 دەن جوعارى بولماۋى تالاپ ەتىلەدى. باستى تالابىنىڭ ءبىرى - جوعارى وقۋ ورىندارىنىڭ ستۋدەنتى نەمەسە ونى بىتىرگەنىنە ءبىر جىلدان اسپاۋى قاجەت. قازاقستان جازعى ۋنيۆەرسيادا ويىندارىنا 1993-جىلدان بەرى قاتىسىپ كەلەدى.
1993-جىلى ا ق ش- تىڭ بۋففالو قالاسىندا وتكىزىلگەن جارىستا ءبىزدىڭ ەلىمىز نەبارى 1 كۇمىس الىپ، جالپى كوماندالىق ەسەپتە 31- ورىندى مىسە تۇتتى. ال 1995-جىلى جاپونيانىڭ فۋكۋوكا قالاسىندا 2 كۇمىسپەن 33- ورىن الدى. ودان كەيىنگى 1997-جىلعى يتاليانىڭ سيتسيليا، 1999-جىلعى يتاليانىڭ پالما قالالارىندا وتكەن ءدۇبىرلى دودادا قورجىنىمىز بوس قايتتى.
ال 2001-جىلى قىتاي استاناسى - بەيجىڭ قالاسىندا وتكەن بەدەلدى باسەكەدەن سپورتشىلار ەلىمىزگە 3 كۇمىسپەن ورالدى. جالپى كوماندالىق ەسەپتە 33- ورىن بۇيىردى.
2003-جىلى وڭتۇستىك كورەيانىڭ تەگۋ قالاسىنداعى جارىستا ءبىزدىڭ قورجىنعا العاش رەت التىن مەدال ءتۇستى جانە ونىڭ سانى ەكەۋ بولدى. بۇل جولى ءبىزدىڭ سپورتشىلار ولاردىڭ سانىن تاعى 4 كۇمىس مەدالمەن تولىقتىردى.
جالپى كوماندالىق ەسەپتە سپورتشىلار 18- ورىنعا كوتەرىلدى. 2005-جىلى تۇركيانىڭ يزمير قالاسىنداعى ءدۇبىرلى دودادا بارلىعى 9 مەدال (1 التىن، 2 كۇمىس، 6 قولا) الىپ، الەم ەلدەرىنىڭ اراسىندا 26-ورىنعا كوتەرىلدى. ءبىزدىڭ سپورتشىلار ءۇشىن 2007-جىلى تايلاند استاناسى - بانگكوك قالاسىنداعى ۋنيۆەرسيادا ويىندارى تابىستى بولدى.
وندا 14 مەدال (5 التىن، 4 كۇمىس، 5 قولا) الىپ قايتقان قازاقستاندىق سپورتشىلار 11- ورىنعا جايعاستى. ەكى جىلدان كەيىن سەربيا استاناسى - بەلگرادتا بولعان بەدەلدى باسەكەدە بار-جوعى 7 مەدالدى (1 التىن، 2 كۇمىس، 4 قولا) مىسە تۇتىپ، 32-ورىن الدى. ال 2011-جىلى قىتايدىڭ شەنچجەن قالاسىنداعى ۋنيۆەرسيادادا جالپى كوماندالىق ەسەپتە 45- ورىنعا قۇلديلاپ، اتالمىش جارىستان 3 كۇمىس، 3 قولا مەدالمەن قايتتى.
2013-جىلى رەسەيدىڭ قازان قالاسىنداعى ءدۇبىرلى دودادا بارلىعى 30 مەدال (3 التىن، 11 كۇمىس، 16 قولا) العان سپورتشىلار جالپى كوماندالىق ەسەپتە 19-ورىنعا تۇراقتادى. وڭتۇستىك كورەيانىڭ كۆاندجۋ قالاسىنداعى 2015-جىلعى ءدۇبىرلى دودادا التىن مەدال سانىن 6 عا جەتكىزگەنىمەن قازاقستاندىق سپورتشىلار ول جاقتان نەبارى 10 مەدالمەن قايتتى. ولار التىننان بولەك 4 قولا جۇلدەگە قول جەتكىزدى. ناتيجەسىندە 11-ورىنعا كوتەرىلدى.
2017-جىلى اتالمىش ءدۇبىرلى دودادا قىتاي تايبەيىندە وتكىزىلدى. وندا ءبىزدىڭ قورجىنعا 3 التىن، 6 كۇمىس، 7 قولا مەدال ءتۇستى. جالپى كوماندالىق ەسەپتە ءبىزدىڭ ەنشىمىزگە 21-ورىن بۇيىردى.
بيىلعى جازعى ۋنيۆەرسيادا ويىندارىندا ءبىزدىڭ ەلىمىزدىڭ اتىنان 94 سپورتشى ەل نامىسىن قورعايدى. ولاردىڭ اراسىندا سەمسەرلەسۋدەن 18 قازاقستاندىق سپورتشى قاتىسادى. ال 16 ى جەڭىل اتلەتيكادا جارىس جولىنا شىقسا، 15 ءى تاەكۆوندودان تايتالاسقا تۇسەدى.
ال ساداقپەن اتۋدان 8، نىسانا كوزدەۋدەن 10، سپورتتىق جانە كوركەم گيمناستيكادان 6، تەننيستەن 4، دزيۋدودان 10، سۋعا جۇزۋدەن 7 سپورتشى قاتىسادى.
جازعى ۋنيۆەرسيادا ويىندارىنىڭ اشىلۋ سالتاناتى نۇر-سۇلتان ۋاقىتىمەن 00.00 دە باستالادى. ءدۇبىرلى دوداداعى جارىستاردى «QazSport» تەلەارناسى تىكەلەي ەفيردە كورسەتۋدى جوسپارلاپ وتىر.
