نۇر-سۇلتاندا العاش رەت ەۋرازيا استانالارى جازۋشىلارىنىڭ فورۋمى وتەدى
قالا كۇنىنە وراي ۇيىمداستىرىلىپ جاتقان فورۋمدى جازۋشىلار وداعىنىڭ نۇر-سۇلتان قالالىق فيليالى مەن «التىن قازىنا» قوعامدىق بىرلەستىگى وتكىزبەكشى.
ورتالىق كوممۋنيكاتسيالار ورتالىعىندا وتكەن ارنايى بريفينگتە نۇر-سۇلتان قالاسى مادەنيەت باسقارماسى باسشىسىنىڭ ورىنباسارى ءناريماش مۇحامبەتالينا ەلوردادا ءدال وسىنداي فورۋم وتكىزەتىن كەز ابدەن جەتكەنىن ايتتى.
«بۇل شارانى تاريحي وقيعا دەپ ايتۋعا بولادى. 20 مەملەكەتتەن استانالىق جازۋشىلار قاتىسقالى وتىر. يسپانيا، ەگيپەت، ءۇندىستان، ازەربايجان، رەسەي، اراب مەملەكەتتەرىنەن اتاقتى جازۋشىلاردى شاقىردىق. فورۋمنىڭ ماقساتى وتە بيىك. ۇلت ادەبيەتىن بارشا الەمگە ناسيحاتتاۋعا ۇلكەن جول اشاتىن فورۋم بولماق. قالا كۇنىنە ۇشتاستىرىلعان شارالاردىڭ سانى كوپ. سولاردىڭ اراسىندا بۇل فورۋمنىڭ شوقتىعى بيىك»، - دەدى ءناريماش مۇحامبەتالينا.
جازۋشىلار وداعىنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى بۇل فورۋم نۇر-سۇلتان قالاسىنىڭ ادەبيءيميدجىن كوتەرىپ، وزگە ەلدەرمەن ادەبي بايلانىستى نىعايتۋدى كوزدەيتىنىن ايتادى.
«قازىر ادەبي اگەنتتەر تۋرالى ءجيى ايتىلىپ ءجۇر. ءبىزدىڭ قازاق ادەبيەتىنىڭ الەم ادەبيەتىمەن بايلانىسى تۋرالى دا كوپتەگەن ماسەلەلەر بار. وتكەن جىلى قازاقستان جازۋشىلار وداعى ەۋرازيا قالامگەرلەرىنىڭ اۋقىمدى فورۋمىن وتكىزگەن بولاتىن. كەڭەس داۋىرىندە الەم ادەبيەتى مەن قازاق ادەبيەتىنىڭ بايلانىسى ناقتى جولعا قويىلعان بولاتىن. تاۋەلسىزدىك جىلدارى بۇل ءىس ءسال اقساپ قالدى. مەملەكەت تاراپىنان قازاق ادەبيەتىن UNESCO تىزىمىندەگى 6 جەتەكشى تىلگە اۋدارۋ قولعا الىنىپ جاتىر. ول ءۇشىن اۋدارما بيۋروسى دا قۇرىلدى»، - دەيدى فيليال ديرەكتورى.
ونىڭ ايتۋىنشا، فورۋمعا قازاقتىڭ 100 اقىنىن يسپان تىلىنە اۋدارعان مادريدتىك اقىن حۋستو حوركە پادرون شاقىرىلعان.
«كەلەسى جىلى ابايدىڭ 175 جىلدىق مەرەكەسىن كەڭ كولەمدە اتاپ وتەمىز. ەرتەڭ سول يسپان اقىنىمەن مەموراندۋمعا قول قويامىز. اباي ولەڭدەرىن يسپان تىلىنە اۋدارۋعا كەلىسىپ وتىر. اباي اتامىزدىڭ ولەڭىن كەز كەلگەن اقىن اۋدارماۋى كەرەك. سوندىقتان فورۋمداعى سۇيىنشىلەپ ايتاتىن جاڭالىعىمىزدىڭ ءبىرى - وسى. بىرىككەن اراب امىرلىكتەرى، اۋعانستان يسلام رەسپۋبليكاسى، قىرعىز رەسپۋبليكاسى جازۋشىلار وداعىنىڭ ءتوراعالارى دا وسى فورۋمعا قاتىسادى. ولجاس سۇلەيمەنوۆ باستاعان قازاقتىڭ اقىن-جازۋشىلارى وسى فورۋم ورتاسىندا بولادى»، - دەيدى داۋلەتكەرەي كاپ ۇلى.
بريفينگكە قاتىسقان جازۋشى الىبەك اسقار مەن اقىن نەسىپبەك ايت ۇلى دا استانالىق جازۋشىلار فورۋمىنىڭ ەلوردا ادەبيەتىنىڭ تىنىسىنا تىڭ سەرپىن سىيلايتىنىن ايتتى.
داۋلەتكەرەي كاپ ۇلىنىڭ سوزىنشە، فورۋمدا كىتاپ ماركەتينگى مەن اۆتورلىق قۇقىق، ادەبي اگەنت ءىسىن دامىتۋ ماسەلەسى دە تالقىلانادى. اتالمىش ماسەلەلەر پوەزيا، پروزا، دراما سەكسيالارىندا جەكە-جەكە تالدانباق.
