باس پروكۋراتۋرا قازاقستاندىقتارعا ۇندەۋ جاسادى
باس پروكۋراتۋرادا ارىس قالاسىنىڭ 350 تۇرعىنىنىڭ جوعالعانى، قالادا ەكولوگيالىق قولايسىز جاعداي تۋىنداپ، قايتا جارىلىس بولۋ مۇمكىن دەگەن جالعان اقپارات ەۆاكۋاتسيالانعاندار اراسىندا ۇرەي تۋدىرىپ، شىمكەنتتە زاڭسىز اكسيالار وتكىزۋگە سەبەپشى بولعانىن ايتا كەتتى.
قازىرگى ۋاقىتتا اتالعان فاكتىلەر تەرگەلۋدە.
سونىمەن قاتار، باس پروكۋراتۋرادا جاڭا ۆاليۋتا - «التىن» ەنگىزىلەتىنى تۋرالى جالعان حابار تاراتىلعاندىعىن دا ەسكە سالىپ ءوتتى.
ودان بولەك، جۇرتشىلىقتى دۇرلىكتىرگەن تاعى ءبىر جالعان حابارلامادا ش ق و- دا باسقا مەملەكەتتەردىڭ ازاماتتارىنا جەر ساتۋ تۋرالى ايتىلعان.
قاداعالاۋ ۆەدومستۆوسى قازاقستاندىقتاردى جالعان اقپارات تاراتۋ سەكىلدى زاڭسىز ءىس-ارەكەتتەردەن باس تارتۋعا شاقىرادى جانە بارلىق قازاقستاندىقتاردىڭ زاڭمەن قورعالاتىن اقپاراتتى ەركىن الۋعا جانە تاراتۋعا قۇقىعى بار ەكەنىن ەسكە سالادى.
باس پروكۋراتۋرا ازاماتتاردىڭ قاجەتتى اقپاراتتى ءتۇسىندىرۋ جانە الۋ ءۇشىن مەملەكەتتىك ورگاندارعا جۇگىنۋگە قۇقىلى ەكەنىن اتاپ ءوتتى. ەگەر سۇراتىلعان دەرەكتەر شەكتەۋلى قولجەتىمدىلىككە يە بولماسا، وندا ولارعا مىندەتتى تۇردە جاۋاپ بەرىلەدى.
«تەك مەملەكەتكە، قوعامعا جانە ازاماتتاردىڭ قۇقىقتارىنا ەلەۋلى زيان كەلتىرۋى مۇمكىن، جالعان، ەكسترەميستىك جانە باسقا دا قۇقىققا قارسى اقپاراتتى تاراتۋعا تيىم سالىنادى.
اتاپ ايتقاندا، قوعامدىق ءتارتىپتى بۇزۋ نەمەسە ازاماتتاردىڭ، ۇيىمداردىڭ، قوعامنىڭ نەمەسە مەملەكەتتىڭ زاڭدى مۇددەلەرىنە ەلەۋلى زيان كەلتىرۋ قاۋپىن تۋدىراتىن ءاربىر فاكتى بويىنشا قىلمىستىق كودەكستىڭ 274- بابى بويىنشا قىلمىستىق جاۋاپكەرشىلىك قاراستىرىلعان»، - دەپ اتاپ ءوتتى ۆەدومستۆودا.
