وتىرارداعى مۇحتار شاحانوۆتىڭ شىعارماشىلىق ۇيىندە «ارىس، ءبىز بىرگەمىز!» اكسياسى ءوتتى
مۇحتار شاحانوۆتىڭ باستاماسىمەن وتكەن اكسياعا اۋدان اكىمى ەرلان ايتاحانوۆ قاتىسىپ، ءوڭىر تۇرعىندارىنىڭ قايىرىمدى ىستەن قالىس قالماي اتسالىسىپ جاتقانىن جەتكىزدى.
«كۇنى كەشە ورىن العان ءتىلسىز جاۋدىڭ سالدارىنان ارىستىق اعايىنداردىڭ باسىنا ءتۇسىپ وتىرعان سىناق وتىرارلىقتاردىڭ دا كوڭىلىن الاڭداتىپ، جۇرەكتەرىن سىزداتۋدا. قايىرىمدى حالقىمىزعا مىڭ دا ءبىر راقمەت! ەلىمىزدە قولعا الىنىپ وتىرعان جان-جاقتى قايىرىمدىلىق ىستەن وتىرارلىقتار دا تىس قالماۋدا. ءومىردىڭ اششى-تۇششى ءدامىن تاتىپ، اتا-بابالارىمىزدىڭ ىزگى قاسيەتتەرىن بويىنا سىڭىرگەن اۋدان اقساقالدارى ۇندەۋ تاستاپ، يگى ىسكە بۇكىل اۋدان تۇرعىندارىن شاقىرعان بولاتىن. بۇگىن ۇندەۋگە ءۇن قوسقان وتىرارلىقتار «ارىس، ءبىز بىرگەمىز!» اكسياسىنا قاتىسىپ، ءبىر كۇندىك جالاقىلارىن ارنايى ەسەپ-شوتقا اۋدارۋدا»، - دەدى ەرلان ايتاحانوۆ.
مۇنان سوڭ مۇحتار شاحانوۆ ءسوز سويلەپ، تاعدىردىڭ سىنىندا توزىمدىلىك تانىتقان ارىستىقتارعا 500 مىڭ تەڭگە تاپسىردى.
«باستارىنا قيىن-قىستاۋ كۇن تۋعاندا ءبىر-بىرىنە باۋىرمالدىق، قايىرىمدىلىق، اۋىزبىرشىلىكتىڭ وزىق ۇلگىلەرىن كورسەتۋ حالقىمىزدىڭ قانىندا بار اسىل قاسيەت.
«تاس تۇسكەن جەرىنە اۋىر» دەگەندەي سىن شاعىنداعى ارىستىق اعايىنداردى سابىرعا شاقىرا وتىرىپ، قيىندىقتار مەن اۋىرتپالىقتاردىڭ بەتىن اۋلاق قىلسىن دەپ تىلەيمىن»، - دەدى مۇحتار شاحانوۆ.
ارىستىقتاردىڭ باسىنا تۇسكەن قيىندىقتاردىڭ ءبارىن ەڭسەرىپ، قالانىڭ گۇلدەنەتىنىنە سەنىم بىلدىرگەن وتىرارلىقتار ءبىر كۇندىك اكسياعا ءوز ۇلەستەرىن قوستى.
اكسيا بارىسىندا جينالعان قاراجاتتار ارىس قالاسىن قايتا قالپىنا كەلتىرۋ قورىنا اۋدارىلاتىن بولدى.
