سوزاق اۋدانىندا كۇننەن قۋات الاتىن ەلەكتر ستانساسى سالىنادى
ەلەكتر ستانساسىن سالۋ راسىمىنە اۋدان اكىمى سالىحان پولاتوۆ پەن «Kazakh Invest» ۇلتتىق كومپانياسى ا ق ايماقتىق ديرەكتورى داۋلەتقوجا مامىروۆ، «Risen Energy» كومپانياسىنىڭ باس مەنەدجەرى چامپيون يۋان قاتىستى. 60 ميلليون دوللاردى قۇرايتىن جوباعا قىتايدىڭ «Risen Energy» كومپانياسى ينۆەستيتسيا سالىپ وتىر.
جوباعا مەملەكەت تاراپىنان قولداۋ كورسەتىلىپ، قۇرىلىسقا قاجەتتى 125 گەكتار جەر تەلىمى بەرىلدى. ستانساعا وسى زامانعى وزىق ۇلگىدەگى قۇرال- جابدىقتارى قويىلادى دەپ جوسپارلانعان. نىسان كەلەر جىلدىڭ باسىندا پايدالانۋعا بەرىلمەك. جوبا تولىق قۋاتىندا جۇمىس ىستەي باستاعان كەزدە تۇراقتى 30 جۇمىس ورنى اشىلادى دەپ كۇتىلۋدە.
«بۇگىندە قاۋىپسىز ەنەرگيا كوزدەرىن دامىتۋ - ەلىمىز ءۇشىن ماڭىزدى مىندەتتەردىڭ ءبىرى. ول ءۇشىن ۇكىمەت تاراپىنان بارلىق مۇمكىندىكتەر جاسالۋدا. وسى ورايدا سوزاق اۋدانىندا ەنەرگەتيكالىق كەشەندى دامىتۋ ءۇشىن ۇلكەن جوبانى ىسكە اسىرعالى وتىرمىز. اتالعان ءىستىڭ قۇرىلىس جۇمىستارىن جۇرگىزۋگە 100 گە تارتا ادام تارتىلادى» - دەدى اۋدان اكىمى سالىحان پولاتوۆ.
